Plie Myntri ia ka tamasa Ñiangtaser ba 2 sngi ha Iewsier Umden

Ka tamasa bna nam ha Ri Bhoi District, kaba la tip kum ka Niangtaser Festival lane ka tamasa Niang World Cup ba ar sngi ka la sdang mynta ka 8 tarik Jymmang ha Iewsier ha ka shnong Saiden, ia kaba la pynlong da ka kynhun jong ka Ri Bhoi Tourism Environmental & Development Forum ha ka jingiatreilang bad ka Dorbar Shnong Saiden.

Ia kane ka tamasa kaba kham pher ha Ri Bhoi District, la pynlong halor ka jingmih jong ki khniang kiba long kum ki niangkongwieng shisien sawsnem bad ka jingmih jong ki ka syriem bad ka aiom jong ka lympung ialehkai football World Cup, kumta la jer ruh ia kane ka tamasa tam khniang world cup kaba don la kajong ka khana ha kaba ki paidbah nongshong shnong na kylleng ki Shnong ka jylla bad kiwei kiwei ki ju leit ban tam ia kine ki khniang ha ka por mynmiet namar ka jingshngiam bad jingbam jong kine ki khniang.

La wan ban plie ia kane ka tamasa Niangtaser kaba ar sngi da u Bah Sosthenes Sohtun, Myntri Sorkar kum u kongsan ha ka jingiadonlang ruh u Dr. Celestine Lyngdoh, MLA ka Umsning Constituency, u Bah EJ Myrthong, Rangbah Shnong ka Saiden, u Bah Plielad Tiewsoh, Chairman ka RBTE&DF nalor ka jingsakhilalang ruh da ki khynnah skul, ki riew paidbah na kylleng ki jaka.

Haba kren maitphang halor kane ka tamasa, u Bah EJ Myrthong, u la iathuh, ba ia kane ka tamasa la pynlong nyngkong ha u snem 2010 ha ka por ba dang long Rangbah Shnong u Bah E.K Lapang (Bam Kwai ha Dwar u Blei), bad naduh katei ka snem ka Dorbar Shnong ha ryngkat ka jingiatreilang bad ki Seng Samla bad Seng Longkmie ki ju pynlong ia kane ka tamasa shisien man ka sawsnem.

U la ong ruh, ba ka jingpynlong ia kane ka tamasa kam dei than tang ban ia lehkmen ia muja halor ka jingiakem khniang hynrei da kaba rah ia ka khubor halor ka jingdonkam ban pynneh pynsah ia ka mei mariang, ban kiar na ka jingpom pathar ia ki dieng ki siej bad ruh ban pynduh noh ia ka rukom rep syrti ne ka jhum cultivation da kaba kyntu ka baroh ki nongshong shnong bad kito kiba don jaka rep ba kin burom lem ia kane ka thong jong ka Dorbar Shnong.

U Bah EJ Myrthong kum u Rangbah Shnong ka Saiden, u la kyrpad ruh ia ki bor sorkar jylla khamtam ia ka Tnad Tourism ban ithuh noh ia kane ka tamasa Niangtaser kum kawei na ki tamasa hapoh ka jylla shibynta ban kyntiew ia ka kam jngohkai pyrthei bad ruh ban long ka jingmyntoi ruh ia ka pateng kaban nang wan.

Haba kren kum u kongsan, u Bah Sosthenes Sohtun u la ai ka jingiaroh ia ka kynhun jong ka RBTE&DF lem bad ka Dorbar Shnong ban pynlong ia kum kane ka tamasa shibynta ban ia kmenlang bad ki paidbah nongshong shnong halor ka jingmih jong kine ki khniang kiba kham pher hapoh ka district ban pynithuh sha ka pyrthei halor ka jingwan ne ka jingmih jong ka khniang Niangtaser shisien ha ka sawsnem.

U la ong ruh, ba kum ka jylla ka la don shibun ki tamasa, hynrei haba ia dei bad kane ka tamasa Niangtaser ka long kaba kham pher namar la pynlong ia ka shisien ha ka sawsnem bad kata ha ka aiom ba baroh ki paidbah ha ka pyrthei ki ju ap khmieh lynti ban sakhi ia ka jingialehkai football World Cup kumta lyngba kum kine ki tamasa lane ki jingshisha kiba don hapoh ka jylla kin nang pynriewspah ha kaba ia dei bad ka kam jngohkai pyrthei bad kiwei kiwei da kaba kyrpad ia ki nongshong shnong ban ri ban sumar ia ki khlaw ki btap, ki dieng ki siej bad kiwei kiwei ki jingdon jingem jong ka mei mariang.

Ha kane ka tamasa Niangtaser kaba ar sngi, la kynthup ia ki jingpyrngia bapher bapher naduh ka jingialehkai football, ka jingpyrngia lyngba ki sur tynrai, ka jingiasah miet ha kaba ki nongiashimbynta kin ioh ia ka lad ban leit tam ne jied ia ki Niangtaser ha ka por mynmiet.