Na krem dewiong ha Mulaibrisume, leit sei ka SDRF ia ka met iap rangbah

Ka kynhun jong ka State Disaster Response Force (SDRF) hynne ka sngi u Blei, ka la ioh sei ia kawei ka metiap shynrang hapdeng 30–40 snem ka rta na kawei ka par dewiong ba la iehshrah ha shnong Mulaibrisumer ba hap hapoh ka Mooriap Border Out Post, East Jaintia Hills District. U Bah S.S.L. Marshillong, Deputy Controller Civil Defence jong ka West Khasi Hills & Assistant PRO ka CD&HG, ula pyntip ba hynnin ka miet ki la ioh ka jingpyntip ba don kawei ka metiap hapoh kawei ka par dewiong ba la ieh shrah ha shnong Mulaibrisumer, kumta ka kynhun jong ka State Disaster Response Force (SDRF) ka la leit ban wad bad ioh sei kawei ka metiap rangbah.

Ia ka kynhun ka SDRF hapoh ka jingialam u Sub-Inspector D. Kharbhih, ka la mih na Headquarter ha ka por 05:30 hynne ka step bad ka la poi sha katei ka jaka ha ka por kumba 10:30 mynstep. Mar ia poi ka kynhun ka rung sha krem dewiong ban wad ia ka metiap. Lyngba ka jingiarap jong u QRT Civil Defence Khliehriat, 3 ngut ki dkhot ka SDRF, kynthup u G/M F. Shangrit, G/M A. Dhar bad G/M M. Chyrmang, ki la hiar shapoh katei ka par dewiong lyngba ka jingkyrshan ka kali khwai ban leit shimti ia ka metiap ba la per hapoh um kaba don ha katei ka par tih dewiong.

Ha ka por 11:15 baje kane ka kynhun ka la ioh sei ia kane ka metiap shynrang bym lah ban ithuh ne tip kyrteng ba don hapdeng 30–40 snem ka rta.Hadien ba la sei ia ka metiap, la aiti sha ki pulit ba kin leh ia kaba donkam bad ban bteng ban pynlong ia ka jingtohkit. Ka SDRF ka la pynpaw ka jingsngewnguh ia baroh ki dkhot ba la don bynta ha katei ka kam bad pynpaw ba ka iengskhem ban shimkhia mardor haba don kino kino ki jingjia na bynta ka jingshngain ki paitbah.