Plie u bah Metbah ia ka jingïalang BEE ha Shillong

U Myntri ka tnat Bording u Bah Metbah Lyngdoh hynne ka sngi u la plie ia ka jingialang jong ka Bureau of Energy Efficiency (BEE) Indo-German Energy Program Partnership Summit for State Designated Agencies (SDAs) ha nongbah Shillong. Ka jingialang ka long na bynta ban iatreilang hapdeng ka tnad bording bad ka German Agency for International Cooperation (GIZ) ban bishar bniah ia ki sienjam ba donkam shim ban kyntiew ia ka bording jong ki jylla bad ka thain shatei lammihngi. Ki don baroh 11 tylli ki tnat na ki Jylla bapher bapher, ki nongthaw polisi, ki heh ophisar na ka Bureau of Energy Efficiency, bad ki nongmihkhmat jong ka GIZ ki la wan sha kane ka jingialang. Haba kren ha kane ka sngi u Bah Metbah ula pynpaw ka jingïalang ka long kongsan ha kaba ka jingpynneh pynsah ïa ka bording bad ka jingpyndonkam hok ïa ka bording ka la kylla long ym tang ki thong jong ka roi ka par hynrei ka long ruh kaba kongsan ha ka ri.

U Bah Metbah ula ban jur ba katba ka jingdawa bording ka nang kiew ha kylleng ka ri, ka jingeh ha ki marpoh khyndew, ki jingtei, bad ka mariang ka nang kiew stet bad kane ka pynkynmaw ia ka jingdonkam ban pynduna ia ka bor ding khnang ban pynmih ia ka bor ding, bad kaei kaba ngi pynduna mynta kan pynwan dur ia ka lawei jong ki pateng ban wan jong ngi. Ha kaba iadei bad ka jingshimkhia jong ka Meghalaya ia kane ka kam, u Myntri u la pyntip ba ka Sorkar, lyngba ka State Designated Agency kaba hap hapoh ka tnad bording ka la shim katto katne ki sienjam ban kyntiew ia ka jingpyndonkam ia ka bor ding ha baroh kawei ka jylla. “Kine ki sienjam ki kynthup ia ka jingpynsngewthuh bad pynshlur ia ki paidbah ban pyndonkam daki LED, ban iatreilang bad ki skul bad ki kolej ban tei ia ka jingsngewthuh halor ka jingpynneh pynsah ia ka bor ding bad ka jingpyndonkam hok ia ka bor ding, ban pynlong ia ki prokram pynroi halor ka ain shna ïing ban pynneh pynsah ia ka bor ding” ula ong. U Bah Metbah u la ban jur ba kane ka dei tang ka jingsdang, bad dang donkam ban leh shibun kiei kiei bad ula ïathuh ruh ba ka jylla ka kut jingmut ban pynkhlaiñ ïa ki jingpyrshang jong ka da ka jingïatreilang bad ka Sorkar Pdeng bad ki Sorkar Jylla ba marjan.

U Bah Metbah u la pynpaw ka jingsngewnguh halor ka jingkyrshan bad jingpyniaid jong ka Bureau of Energy Efficiency (BEE) ia ka tnad ba la buh kyrpang da ka jylla, kaba la don ka bynta kaba kongsan ha kaba thaw ia ka phang pdeng jong ka ri bad ai bor ia ki tnad ba la buh kyrpang na ka jylla. U la kyntu ia baroh ban pynthikna ba man la ka unit jong ka bor ding kaba la pynmih bad kaba poi sha ki paidbah la pyndonkam da ka jingstad kum ki nongshong shnong kiba don ka jingkitkhlieh.U Myntri u la pynthikna ha ka jingialang ba ka Meghalaya kan dang iai bteng ban don ka bynta kaba tyngeh ha ka national mission na ka bynta ka jingpyndonkam bad pynneh pynsah ia ka bor ding, da kaba iatreilang ban tei ia ka India kaba kham jyrngam, kaba stad, bad kaba lah ban neh.