Plie u MR ïa ka jaka ïeng kali Automated Multilevel ba nyngkong eh ha ka Jylla

U Myntri Rangbah ka Jylla u Conrad K Sangma hynne ka sngi u la plie paidbah ia ka jaka ieng kali ba nyngkong eh hapoh ka Jylla kaba dei katkum juk stad mynta lane ka Automated Multilevel Car Park, ha Vivekananda Road, Additional Secretariat, Shillong. Haba kren ha kane ka sngi u Conrad u la ong ba napdeng ki jingeh kiba bun kiba ka nongbah Shillong ka ïakynduh kawei na ki jingeh kaba jia man ka sngi kadei ka jingkhapngiah bad ka dheng kali hapoh Nongbah. “La thaw ia ka buit treikam kaba bun bynta ban pynduna suki suki bad ban weng ia ka jingkhapngiah ha ka sor Shillong. Ka jingplie iaka Automated Multilevel Car Park ka dei tang kawei ka bynta jong ka jingpynbeit” u la ong.

U Conrad u la pyntip ruh ba ki dang don sa kumba 9 tylli ki jaka ieng katkum ka juk stad mynta lane ki Automated Multilevel Car Park kiba dang don ha ka jingpynkhreh ki ban pynlong jaka ieng kali na ka bynta kumba 1300 tylli.Ban pynkha shuh shuh ki jaka ieng kali, u Myntri Rangbah u la pyntip ruh halor ka Policy pynieng kali ha kaba ki riew shimet kiba don jaka ki lah ban iatreilang bad ka Sorkar ban pynkha ia ki jaka ieng kali ha kaba u trai jaka u lah ban lum khajna na ka jaka ieng kali. “La peit bniah ïa ki liang bapher bapher bad kawei na ki daw kaba pynlong ïa ka jingdheng kali ka long namar ba ki briew ki pynieng kali khlem ka jijgkitkhlieh” u la ong hynrei u la bynrap ba ki briew ki hap ban ai ïa ki jaka ieng kali ba la buh kyrpang ha kaba ki lah ban pynieng kali.

U Myntri Rangbah u la pynpaw ruh iaki rukom treikam bapher bapher jong ka Sorkar ban pynsuk ia ka leit ka wan bad ban pynduna ia ka jingkhapngiah ha ka Nongbah bad kaba kongsan ka long ban thaw jaka ieng kali ia ki bos kamai bad ki taksi kamai ha Kyndailad, ka jingpynkynriah ia ki nongdie madan na ki surok, ka jingpynheh ia ka surok na Umshyrpi sha 7 Mer, ka jingpynshna surok 4 Lane na Rhino Museum Point sha Civil Hospital bad Barik bad ka jingpynkynriah iaka Administration Block sha New Shillong Township. “Baroh kine ki jingtyrwa ki dang don hapdeng ka Iingbishar bniah bad la shim ha ka rukom ban pynthikna ïa ka jingsuk jong ka iaid ka ieng ki paidbah bad ki kali ym tang na ka bynta ka jingpynlait mardor ïa ka leit ka wan hynrei na ka bynta ki phew snem ban wan” u la ong.