Pynbna u Conrad ban ai Mini Secretariat ha ka Amlarem Civil Sub-Division

U Myntri Rangbah u Conrad Sangma hynne ka sngi ula pynbna ba ka Amlarem kan sa ioh ia ka Mini Secretariat bad ban mang pisa ia ki surok hapoh ka shnong Amlarem, katba lah yn pynkloi ia ka mang pisa ban sdang ia ka jingtrei hapoh ka jinglehkmen ka jingdap 50 snem ka Amlarem Civil Sub-division, West Jaintia Hills. ula bynrap “Ka Amlarem Civil Sub-division dei ba rim tam, kumta ka dei hok hi ban ioh ia ka Mini Secretariat”.

Ia kane ula kren ha ka jingialang plie pyrda ia ka jingdap 50 snem ka Amlarem Civil Sub-Division ha ka jingdonlang u Lahkmen Rymbui myntri ka tnat pule puthi bad u MLA ka thaiñ, u Sosthenes Sohtun Minister C&RD, u Sibhi C. Sadhu IAS director C&RD, u Abhinav Kumar Singh DC, West Jaiñtia Hills, ka Anendya Raajsshre IAS, SDO Amlarem Civil Sub-division, u Banteilang J Kharshandi director of school education and literacy, u Dr. Bamuthimi Lyngdoh BDO Amlarem, u Medling M Swer MDC JHADC bad kiwei ki ophisar.

Ula ong, ka sorkar katba lah ka ialeh ban pynjan ki lad ai jingshakri ia ki paidbah da kaba plie ki ophis  treikam ha ki Sub-Division, ki Block ophis bad kiwei ki tnat treikam bad ban shna pynbha ia ki ophis treikam kiba la don lypa.Ha kane ka sngi u Myntri Rangbah ula pynbna ban ai jingiarap T.20 lak na ka Chief Minister Special Grant sha ka  jinglehkmen dap 50 snem ka Amlarem Civil Sub-Division. Shuh shuh na ka ki kynhun ba shim bynta ha ki jingshad jingrwai bad tem Guitar ba mihkhmat na ki skul u kular ban iarap kum shibynta ban pynshlur ia ka sap ka phong  jong ki.