Pynlynguh ka ‘Def Leppard’ da ki jingtem bad rwai ia hajar ki paitbah

Ka kynhun tem “Rock” ba pawnam na England ka “Def Leppard’ hynnin ka sngi ka la pynlynguh phum ia ki hajar ngut ki paitbah ha ka Concert ka BookMyShow Live ha RBDSA Sports Complex, Pahamsyiem Nongpoh, Ri Bhoi District.

Ki paitbah na kylleng ki jylla ka thain lammihngi ki la tuid da ki hajar ngut ban sakhi ia ka kynhun tem Rock ba pawnam ha pyrthei ha ka sien nyngkong ha ri India bad ka la sdang ia ka ‘Tour’ na Meghalaya sha kylleng ka Ri. Ka Def Leppard kan leit tem ruh sha Mumbai bad kan pynkut ia ka tour ha India ha Bengaluru.

Ka kynhun tem ‘Trance Effect’ ka la pynshongshit ia ki paitbah bad hadien ka kynhun Def Leppard ka la kiew rynsan ban pynshongshit ia ki hajar ki paitbah da ki jingrwai ka pawnam kynthup ia ka ‘Bringin On the Heartbreak’, ‘Hysteria’, ‘Animal’, ‘Love Bites’, ‘Photograph’, ‘Rock of Ages’, ‘Animal’, ‘Foolin’’bad kiwei kiwei bad ka la pynkut da ka jingrwai “Pour Some Sugar on Me” kaba la pynlynguh phum ia ka madan.

Katba ka Def Leppard ka dang tem bad rwai, ki hajar ngut ki paidbah naduh ki samla haduh ki rangbah ki la iarwai lang bad shad bad kane ka kynhun tem Rock kaba la don 49 snem ka jingiaid lynti ha ka tem ka put. Nalor kane u nongtem drum uba don tang shilliang kti u Rick Allen haba ula tem Drum marwei, ki paitbah ki la ia risa ia ka jingtbit une u nongtem drum.

U Naman Pugalia, Chief Business Officer – Live Events, BookMyShow, ula ong, “Ka Def Leppard ka mihkhmat ia ka juk ka nongtem Rock ba la pynwandur ia ka pateng ki nongieid jingrwai ha India bad ki la ioh ban pyniasoh bad kane ka rukom tem. La sakhi kane ka kynhun ka la pynkhie im ia sap tem bad rwai bad ki riew ieid jingrwai ki la rwai lang bad ka la pynshoh biej ia ki paidbah na ka jingtbit ka jingtem Rock”.

“Kane ka jingwan ‘Tour’ ka pynshongshit ia ki paidbah ba ka kynhun tem ba pawnam ha pyrthei ka la ioh ban pyniasoh bad ki riew ieit jingrwai bad tem ka ri India” la ong u Pugalia.

Haba iakren bad ki katto katne kiba la wan sha kane ka Concert ki la pynpaw ia ka jingkmen ban sakhi ha ka sien nyngkong ia ka Def Leppard bad ki la pynpaw ruh ba ki kwah ban sakhi ia kiwei pat ki nongtem ba pawnam ha ka pyrthei ba kin wan ban pynshongshit ia ki riewieid jingrwai ka jylla Meghalaya bad ia ka thain shatei lammihngi ka ri.