Pynshai ki Myntri ia ka jingkren halor ka Reservation ha ka sngi rakhe lyngkhuh sngi iap u PA Sangma

Ka National People’s Party, West Jaiñtia Hills Unit mynta ka sngi ka la kynmaw burom ia ka lyngkhuh sngi iap ba shiphew jong u nongseng jong ka u Purno A Sangma uba long ruh u speaker barim ka Lok Sabha ha ka jingialang ha Chutwakhu Indoor Sport Hall, Jowai. Ha kane ka jingialang kynmaw burom nalor ka jingdonlang ki paidbah nongkyrshan ka party NPP na ki unit bapher bapher ka West Jaiñtia,  u Dy CM ka sorkar uba dei ruh u MLA ka Nartiang u Sñiawbhalang Dhar ula long kum u kongsan bad u myntri ka tnat ka koit ka khiah bad Sport uba dei ruh u MLA ka Jowai u Wailadmiki Shylla kum u symbud kongsan. La donlang ha kane ka sngi ka Santa Marry Shylla MLA Sutnga Saipung Constituency, ki MDC NPP ka JHADC ba kynthup naduh u CEM Thombor Shiwat, u Chairman Dr.Sankey Shangpung lem bad kiwei pat ki MDC. U Wailadmiki Shylla haba kren ula pynkynmaw ia ka jingiaid lynti jong u bad kane ka party NPP khamtam ha u snem 2018 ba u sdang iakhun ia ka Election MLA, ha kaba bun ki ong ba kim pat pdiang ia kane ka party, hynrei u sngewkmen pat mynta na ka jingiaid lynti barit la bun kiba wan pyniasoh bad ka party NPP.

Bad kane ka jingsdang suh thied ka NPP u ong, ba ka long thik kum ka jingiaid lynti u nongseng jong ka u Purno Sangma, ha kaba sdang u don bynta shwa bad kiwei ki party. Hynrei hadien u sngewthuh ba kum u nongialam ki riewlum uba iakhun na bynta ka hok ki tribal bad ba ula long ruh ka sur na bynta ka thaiñ northeast kumta u iohi ia ka jingdonkam ban don ia ka party na ka thaiñ ban pyniatylli bad ba ka Delhi kin shah shkor ia ki jingeh ka thaiñ kumta ula seng noh ia ka National People’s Party ha u 2014. U ong ba u symbai ba la bet u (L) Purno Sangma mynta ula pur ha kylleng ki jylla ka thaiñ northeast, ka la don ruh ia ka State Unit hapoh Rajasthan, Kerela. U ngeit skhem ba u Purno Sangma ruh u kmen ban iohi ia ka jingnangkiew ka party ba u seng. Bad haba ong ba kane ka party kam shym la pyniapher la ha ka niam ne jaitbynriew bad ula pynkynmaw bad pynshai ruh halor ka jingshim bynta jong u lem bad u Dy. CM ban kren pynbeit ia ka jingkren uwei na ki pra MLA hapoh Assembly uba kren halor ka Reservation Policy da kaba pynmih tang ia ka kyntien Khasi khlem pynmih Jaiñtia wat haba la thoh lang Khasi bad Jaiñtia ha ka Reservation.

Ula ong ka jingkren jong ki kam mut ban pyniapher jaitbynriew hynrei tang ban pynbeit bad pynshai ia ka jingkren bakla u para MLA, ba kum ki MLA jaiñtia ki sngewkhia ia kane namar ba kiei ba kren hapoh Assembly dei ka record.U ong kam pher lada don ka jingpyni ñia kiba bun ha kano kano ka rukom ruh, hynrei kaba sngewdiaw dei ka jingmih hi da ki briew Jaiñtia bad khamtam kaba ma shuh shuh ba ki MDC ka JHADC kiba la jied ban peit ia ka riti dustur ka khyndew ka shyiap hapoh Jaiñtia Hills Autonomous District Council da lade hi ki mih ban kylli ba ngi dei ki jaitbynriew aiu ?. Kata dei kaba ma bad pynsngewsih kum u nongialam, u ong lada ki kwah ban iatai ka District Council ka don na ka bynta jong ki ban pynshisha. U Dy CM Sñiawbhalang Dhar haba kren u kyntu ia ki para nongkyrshan ban bud ia ka nuksa u nongialam u (L) Purno A Sangma namar ka jingkynmaw burom ia u khlem da bud katto katne ki jinghikai ba ula buh ka party kan ym im.

“Lada iakren hapoh Jylla Meghalaya ngi ki Jaiñtia ngi ioh iaroh ha ka politic namar ki Khasi ki juh iakren ba ki Jaiñtia ki stad bha ban jied nongmihkhmat kim juh jied da ka party bym ioh bor shynshar namar ha kano kano ka sorkar don beit ki MLA Jaiñtia, bad kane ka pyni ia ka jinglong ryngkat ki nongialam bad ki paidbah” ong u Sñiawbhalang Dhar.Bad ula ong ruh “Kine baroh ki jia dei namar ba ngi ki nong Jaiñtia ngi dang burom ia ki kñi ki woh, ngi burom ia ki nongialam politic, ki nongialam ñiam, ki nongialam ha ka imlang sahlang bad ki nongialam ha ki liang bapher bapher”.Haba bynrap ia ka jingpynshai u Wailadmiki Shylla halor ka Reservation ula ong, lada ka riti dustur jong ngi kam im, ka jaitbynriew ruh kan sa iap. “Haoid halor kato ka jingkren jong nga hapoh Assembly don ki paralok Khasi jong nga kiba kylli balei ba me pynheh ia ka issue barit, nga jubab ia ki, lehse ka rit haphi hynrei ka heh ha nga” iathuh u Sñiawbhalang.

Ula ong kumba la hap buh record beit ia kaei ba la kren hapoh Assembly, u kwah ba lada dei kaba rit ne heh ruh ym dei ban jah na ka jingithuh bad kiei kiei baroh kin urlong da ka jingiatylli.Haba u bynrap halor ka jinglong nongialam u ong, ha ka por election ngi juh ia nia ia kawang ktieh hynrei hadien ka election dei ban iatreilang na ka bynta ban im ka jaitbynriew ka Jylla, namar ka thong hi tang kawei, kata ngi dei na ka bynta u paidbah ym ki paidbah na ka bynta jong ngi. “Ngi ki MLA Jaiñtia lada ngi don ha kano kano ka party ruh ngim juh ia shrut namar ngi sngewthuh ba ngi dei na ka bynta u paidbah bad ka sorkar ka leit ka wan hynrei ka jingshakri ia u paidbah dei ban long kumjuh, ngi shaniah ha u paidbah bad tei na ka bynta u paidbah” bynrap shuh shuh u Sñiawbhalang Dhar.