Ka Youth Parliament ka baar sngi la pynlong da ka Tura Christian College (TCC) Department Political Science lyngba ka jingbei tyngka ka Meghalaya Legislative Assembly ka la sdang hynnin bad kut mynta ka sngi ha District Auditorium, Tura.
La plie ia ka jingialang da u Lamphang ka ïing dorbar thawaiñ u Thomas A. Sangma uba long u MLA ka North Tura kum u Kongsan.
Haba kren ha ka jingialang, u Lamphang ula pynpaw ka jingsngew tynnad ban sakhi ha ka sien nyngkong ia ka Youth Parliament ha Tura bad ula iaroh ia ka Tura Christian College, ki nonghikai, ki samla pule barim bad ia ka kynhun ba pynbit pynbiang ia ka prokram ban shim ia ka sien jam ban saiñdur ia ka jingmut jingpyrkhat samla ha ka synshar paitbah.
U la pynpaw ka Youth Parliament la kyrshan pisa da ka Meghalaya Legislative Assembly bad ula ong, ba kane ka pyni ia ka jingshim khia ka Assembly ban bteng ban pynshlur ia ki samla ban iashim bynta bad pynkhlain ia ki bor sngewthuh halor ki kam synshar paitbah.
Haba kdew halor ka mat, “The Voice of Youth: Shaping the Future of Governance,” u Lamphang ula ban jur ka lawei ka synshar khaddar ka shong ha ka jingstad, ka jingkitkhlieh ki samla bad ki nongshong shnong.
U la ong ka rynsan kum ka Youth Parliament ka plie lad ia ki samla ba kin ioh jingtip halor ka rukom treikam ka ïing dorbar thawaiñ, kumno la iatai halor ki aiñ ki kanun bad kumno la shim ki rai lyngba ki jingiakren bad ka jingiatai nia.
“Ka Assembly ka dei ka jaka iatai ban ai jingmut, ia ki jingkylli bad halor ki lad ban shim khia ban pynbeit ia ki jingeh na bynta ka bha ka miat ki paitbah. Ka Youth Parliament ka plie lad ia ki samla pule ban sngewthuh shaphang ka rukom pyniaid ia ki dorbar” ula ong.
La ioh ruh ia ka jingkren na u Dr. Andrew Simons, Commissioner & Secretary barim bad u Adviser (Legislation) jongka Meghalaya Legislative Assembly.
Ka Youth Parliament kan kut ha ka 3 tarik ha kaba u Dr. Wanwei Roy Kharlukhi, u MP ka Rajya Sabha kum u kongsan yn wan ban pynhap pyrda ha kaba yn donlang u Malthus S. Sangma, MCS, Secretary jongka Meghalaya Legislative Assembly kum u Kongsan Symbud.
You may also like
-
Ym don ba lah ban pynkhuid marwei ia ka shnong bad ka Jylla: Sniawbhalang
-
Pynlong Ka Shnong Saiden Ïaka Jingpynkhuid Shnong, Shim Khia U MLA Ban Pynurlong Ïaki Jingangnud Ka Shnong
-
Pynkup burom ia saw ngut ki tymmen ha ka sngi rakhe ki riew tymmen
-
Iatehlok ka Vi Business bad ka Cisco ban pynkhlain ia ka jingtyrwa ia ka SD-WAN
-
Ki Facilitation Centre ki dei ban don Food Court”