Pyrshah ka VPP ban pynduh ‘Law Adong ia ka khlaw Mawpat

Ka State Youth Wing bad ka Womens Wing ka Voice of the People Party (VPP) hynne ka sngi ka la lum ia ka jingialang paidbah ban pynpaw ia ka jingpyrshah halor ka jingpynduh ia ka Law Adong, Mawpat. Ha katei ka jingialang paidbah ba long ha Langkyrding la wan iashim bynta naduh ki MDC, ki nongialam ka VPP ryngkat ka jingdonlang ki paidbah nongshong shnong. Ha kane ka sngi, ki nongialam ki la pynsngew ba ka VPP kan ieng skhem ha ka nongrim bad kan nym ai lad ban weng ia ka Law Mapat na ka jinglong Law Adong.

U Dr. Kara. H. Chen u Vice President ka VPP haba kren ha ka jingialang paidbah, ula ong ba ha ki shiphew snem mynshwa hapoh ka jingialam u bah Ardent ia ka Executive Committee, la pynbna paidbah ba ia kane ka Law Mawpat la pynlong sha ka Law Adong, hynrei kaba sngewsih mynta ka long ba tang hadien katto katne por, don ki bor kiba la pynkylla biang ia kane ka khlaw. U Vice President ka VPP ula kynnoh ba ki nongpyniaid ka District Council kiba wan hadien jong u bah Ardent, ki la pynkhein ia ka jingpynlong ia kane ka khlaw ka Law Adong. “Ka jingleh ka jong ki, ka pyni ba kim don ka jingsngewthuh ne ka jingpyrkhat na bynta ka jingbha ki nongshong shnong,” ula ong.

Ula ong ba ka jingthmu ba pynkylla Law Adong, ka long ban nym shah iano iano ban pynjulor ia kane ka khlaw, khnang ba ka jingdon ki khlaw kan ai ka jingmyntoi ia ki nongshong shnong. U Dr. Kara ula bynrap ba ha man ki sorkar la ka long ha sorkar pdeng ne jylla, ki don beit ia ka tnad Khlaw namar ba ki tip ba ka jingdon ki khlaw ka long kaba donkam tam bad donkam ban iada na ki jingpynjulor. “Ka EC ba ialam u bah Ardent mynshwa ka pyrkhat na bynta ka jingmyntoi ki shnong kiba markhap ka khlaw bad ki nongshong shnong ka sor Shillong, khnang ba kin ioh ring mynsiem ia ka lyer kaba khuid bad kin ioh ka tyllong um ba khuid,” ula ong. Katba na ka liang u bah Marbud Dkhar u nongialam ka State Youth Wing ka VPP, ula iaroh ia u bah bah Ardent uba la iohi jngai ha kaba ha u snem 2014 ula pynkylla Law Adong ia ka Law Mawpat namar kane ka khlaw ka ai jingmyntoi bha khamtam ia ki shnong kiba marjan ha kane ka jaka. Ula ong ba ha ka jingjurip ka seng, la lap bun ki mawpud ki don ha kane ka Law Adong bad ka seng ka tip shai ba la ai jaka sha ki riew shimet ne ki politisian. “Na ka liang ka VPP ngi kwah ba ngin pynneh pynsah ia ka mariang ban iada ia ka khlaw na bynta ka lawei ka pateng ban wan. Ngin ieng skhem ha ka nongrim ban nym ailad ban weng ia ka Law Mapat na ka jinglong Law Adong,” ong u bah Marbud. Ula bynrap, “ Ngin ieng pyrshah haduh ba kut bad ngin bteng ban iakhih ban pyntikna ba kane ka Law Mawpat kan long beit ka Law Adong.”