Rai ka MCTODA ban ym siew khajna ha ki khyrdop beain, kyntu ia ka Sorkar bad KHADC ban bishar bniah

Ka Meghalaya Commercial Truck Owners and Drivers Association (MCTODA) hynne ka sngi kala kyntu iaka Sorkar Jylla bad ki bor pynïaid jong ka KHADC bad JHADC ban bishar bniah iaki khyrdop (Toll Gate) kiba treikam haki surok jong ka Rilum Khasi-Jaintia. Haba iadei bad kane ka MCTODA kala pynpaw ba shen kan sa phah daka jingthoh shaka Sorkar bad ki bor synshar District Council ban bishar bniah halor kane. Ïa kane ka rai la shim haka jingïalang hynne ka sngi ha nongbah Shillong hapdeng ki trai bad ki nongniah trok. Haba kren shaki lad pathai khubor u president ka MCTODA u Bah Bah Mosklandar Mangar ula ïathuh ba haduh mynta ki nongniha trok ki siew khajna tang haki 3 tylli ki khyrdop kata 2 tylli jong ka KHADC bad 1 jong ka Hima Mylliem kiba don ha MIDC.

U Bah Moskalandar ula ïathuh ba mynta ka kynti ki trok trai Jylla kiba iaid hapoh ka Rilum Jaintia kim donkam ban siew iaka khajna hynrei ki don pat ki khyrdop kiba shim naki trok bar Jylla.“Haka jingïalang mynta ka sngi ngi la rai ban nym ai satia ka khajna shaki khyrdop lada kadei jong ka Sorkar ne jong ka KHADC ne jong ki Hima, lada ki khyrdop ki treikam khlem da ioh jingbit naka ain lane kim lah ban pynshisha bad pynshai ha kano ka nongrim ki pynieng khyrdop” la ong u Bah Moskalandar.U Bah Moskalandar ula ïathuh ba ki trai bad ki nongniah trok naduh 2019 kila iakhun pyrshah iaki khyrdop ha kaba bun ki nongniah trok kila shah shoh hadien ba kila kyntait ban siew khajna.

Ula ïathuh ba hadien ka jingleit ujor ka MCTODA shaki bor district Ri-bhoi District, ki trok mynta ka kynti kila lait ban siew khajna.“Ka jingïakhun pyrshah iaki khyrdop lum khajna kam dei tang pyrshah iaki khyrdop jong ka KHADC hynrei wat ki khyrdop jong ka Sorkar ruh. Mynta ka sngi ngi la rai ba ngim nym siew khajna haki khyrdop kiba treikam beain hynrei lada ki khyrdop ki treikam katkum ka ain, ngin ai ka khajna” ula ong.Nalor kane u President ka MCTODA ruh ba haka jingïalang ki dkhot jong ka Association kila ai jingmut ba donkam ban dawa naka Sorkar bad naki bor District Council ban bishar bniah haba iadei bad ka jingdon ki khyrdop (Toll gate) hapdeng ki surok bah.