Ka Policy ka sorkar ka knieh noh ia ka pliangja ki kali kamai

Ka All Khasi Meghalaya Tourist Taxi Association (AKMTTA) hynne ka sngi ka la rai ban pynlong ka jingiakhih da kaba shong kyllain mungor ha ka 26 tarik Nailar ha Khyndai Lad. Ia kane ka rai la pynbna da ka executive member ka AKMTTA u Bah Balajied Jyrwa bad ula ong ba kane ka jingiakhih ka dei ban pyrshah ia ka Policy ba la pynmih da ka Sorkar ban shah ia ki kali riew shimet bad arshaka ban kamai hadien ba la Register bad ioh jingbit na ki District Transport Officers (DTO).Haba kren sha ki lad pathai khubor u Bah Balajied ula ong ba ki kali Tourist ki kamai da ka siew artad ia ki khajna bapher bapher hynrei kane ka Policy jong ka Sorkar ka long kumba plie lad ia ki kali shimet ban knieh noh ia ka pliang ja jong kali Tourist kiba dei hok ban kamai.

U Bah Balajied ula ong, naduh mynshwa ka AKMTTA ka la phah da ka Dorkhas sha ka Sorkar ban pyrshah ia ka Policy ba la shna ban plie lad ban kamai ia ki kali shimet hynrei haduh mynta ka Sorkar kam pat patiaw ia ka jingdawa ka Association.”La bun bun sien ngi la iakren bad ka Sorkar kynthup ia u Myntri Rangbah ka Jylla halor kane ka Policy bad na ka liang ka Association ruh ka la ai jingmut kumno ban pyntyllun ia ka kam hynrei haduh mynta ka Sorkar ka dang sngap jar. Namar kata ngi la rai ban pynlong da ka jingiakhih ha ka 26 tarik Nailar ha Khyndai Lad” la ong u Bah Balajied.

U la bynrap ka Association kan dang iai bteng ban iakhih ban pynbor ia ka Sorkar Jylla ban pynsangeh mardor iaka Policy ba shah kamai ia ki kali bad arshaka shimet.Haba ia dei bad kane ka Meghalaya Commercial Truck Owners and Drivers Association (MCTODA) ruh ka la rai ban ai ka jingkyrshah ia ka AKMTTA ha ka jingïakhih ka ban long ha ka 26 tarik Nailar.Ka MCTODA ka phah ka kyrwoh ba ki trai bad ki nongniah trok ka rilum Khasi-Jaintia kin leit shim bynta lang bad ka AKMTTA ban shong kyllain mungor ha Khyndai Lad ha ka 26 tarik Nailar.