Shah ktah ki samla pule bym don Vice Chancellor NEHU

Ki kynhun bapher bapher ka skulbah NEHU kynthup ki Non-Teaching Staff Association, ka KSU-NEHU Unit, ka North Eastern Hills University Students Union (NEHUSU), ka North Eastern Hills University Teachers Association (NEHUTA), hynne ka sngi ki la leit iakynduh ia u Myntri Rangbah ka jylla u Conrad K. Sangma ban pynsngew ia ki jingeh ba kane ka skulbah ki iakynduh jingeh na ka jingbym don ki nongpyniaid ba thikna ban pyntyllun ia ki kam ki jam. Kine ki kynhun ki la pynsngew sha u Myntri Rangbah ia ki jingeh halor ka jingbym don ki nongpyniaid kum u Vice Chancellor bad kiwei ki nongtrei kum ki Registrar, u ophisar ka Finance ha kaba ka la ktah lut ia ki kam kane ka skul. Haba kren sha ki lad pathai khubor u President ka NEHUTA u Prof. Lakhon Kma ula ong ba ki la kyntu ia u Myntri Rangbah ba un tuklar ban bthah ia ka Pro Vice Chancellor ka NEHU Tura Campus ban shimti ia ki jingkitkhlieh na bynta ban pyniaid ia ki kam ha NEHU, Shillong.

“Ka NEHU kam don ia ki nongpyniaid, ym don ia u VC, Registrar, Finance bad kane ka la ktah ia ki kam ha kane ka skulbah bad ngi la kyntu ia u Myntri Rangbah ba un tuklar, khnang ban don ia u nongpyniaid ha NEHU,” ula ong. U President ka KSU-NEHU Unit u samla R. Nongrem ula ong ba kane ka skulbah kam shym la don ia u VC kaba la kynjoh mynta sha 424 sngi bad ki ophisar ruh ym don shuh. Ula ong ba ka jingbym don ia ki ophisar, ki Registrar ka la ktah ia ki khynnah pule, ha kaba wat ka Scholarship ban aplai ruh ka la shem jingeh namar ym don ba soi bad ym don ba peit ia ki kot ki sla ki File. Katba na ka liang u President jong ki Non-Teaching Staff Association u bah M. Thangkhiew, ula ong ba ka jingeh ba don ha NEHU ka wanrah jingeh ia ki samla kiba wan na ki longiing kiba duk ba suk. Ula ong ba ka jingbym don ki nongmihkhmat ban pyniaid ia ka skulbah, ka la ktah bad buh jingeh ban pyntyllun ia ki kam namar mynta ki don sa tang hapoh 200 ngut ki nongtrei ba pura ha NEHU.

Ula ong ban kyntiew ia kane ka skulbah, la iarap da ki paralok ki Contractual, watla kim shym la ioh ia ka tulop ruh.Halor kane, na ka liang jong u Myntri Rangbah ula kular ba un shimkhia bad un pyrshang ban iakren bad ki bor pyniaid ka sorkar pdeng ban iarap ban weng ia ki jingeh kiba don ha kane ka skulbah NEHU. Ha kajuh ka por, na ka liang ki samla pule, ki la pynpaw ka jingkhmih lynti ba kane ka skulbah kan ioh ia u soh ba bha bad sa shisien kan ioh biang ban wanrah ia ka nam bad burom jong kane ka skulbah ha ka liang ka pule puthi.