Shah thombor ka khynnah Khasi ba kyntait khaii met, leit pyllait ka KSU Delhi

Ka Khasi Students’ Union (KSU) Delhi Unit ka la ioh ban pyllait ia kawei ka khynnah kynthei na ka jingshah thombor ha ki katto katne ki shynrang ha ka jaka sah.Ha ka kyrwoh ka KSU ka la pyntip ba ka seng, ka la ioh pdiang ka jingkyrpad ban  iarap na kawei ka khynnah kynthei Meghalaya ba ka para jong ka ba trei ha Delhi ka la shah thombor bad shah shoh ha ki katto katne ngut ki shynrang ha ka jaka sah jong ka.Ka KSU Delhi Unit ka la pyntip sha ka SPUNER bad ryngkat bad ki pulit ka Malviya Nagar ki la leit sha katei ka jaka bad la ioh ban pyllait im ïa kane ka khynnah kynthei na katei ka jaka.

Katkum ka jingiathuh u nongshah kynnoh, ula ong ba kane ka khynnah kynthei ka la shim pisa na u bad kumta ula leit sha jaka sah namar ka kyntait ban pynphai ïa ka pisa.Katba ka khynnah kynthei ka la iathuh ha ki pulit ba ka la kyntait ban rung sha ka kam khaii met bad dei na kane ka daw ka la shah thombor ha kitei ki briew.Kane ka khynnah ba shah thombor bad u nongshah kynnoh, mynta ki don ha ka jingtohkit jong ki pulit.

Ka Seng ka dang trei ryngkat bad ki bor pulit ba dei khmih ban pynthikna ba ïa kane ka khynnah yn phah biang sha ïing hadien ba la pyndep ia baroh ki jingdonkam jong ka aiñ.Ka KSU Delhi Unit ka kyrpad ïa ka sorkar ba kan shim ïa ki sienjam ba tyngeh ban khanglad ïa kum kine ki jingjia ha ki por ban wan bad ka la kyntu ïa ki paidbah, khamtam ïa kito ba wad kam ba kin pynshisha ïa baroh ki jingtip ha shuwa ban leit trei shabar jylla.