Shim bynta u MR ban thung dieng ha ka sngi rakhe World Environment Day

U Myntri Rangbah ka jylla u Conrad K. Sangma hynne ka sngi ula iashim bynta ha ka jingrakhe ia ka World Environment Day 2025 da kaba thung dieng ha madan Ummir kaba don ha ka shnong Ummir, New Shillong Township. Ha kane ka jingrakhe u Conrad Sangma ula thung ia u dieng ha ka Lad Umniuh. Haba kren ha ka jingialang, u Conrad ula kyntu ia ki paidbah ban iashimbynta bad ban don ruh ia ka jingkitkhlieh shimet ha kaban pynneh pynsah iaka mariang bad man la ki jingshimkhia kiba rit ne baheh, la kadei ka jingpynlip ia ka bording haba ym donkam, ban ym pynleh noh ei ia ka um ne ban rah ia ki nuit ban leit bret ha ki jaka bret, kine ki jingmlien kidei ban long shi bynta ha ka jingim kaba man ka sngi.

Ula ong, ba ka jingkylla kaba neh slem, ka mih na ka jingleh kaba shimet shimet, ym tang halor ka jingpynbna ia ki polisi treikam bad kumta ym dei ban don ia ka jingkitkhlieh ne jingsngewkhia tang ha ka sngi rakhe ia ka World Environment Day, hynrei dei ban pynkylla long ia kane ka jingkitkhlieh kum ka jingmlien kaba man la ka sngi ha ka jingim. U Conrad ula batai ruh ia ki jingpyrshang jong ka sorkar ban iakhun ia ka jingkylla ka suinbneng bad ka jingshah pynjulor jong ka mariang bad ula iathuh ba hapoh ka jingialam ka jongu palat 1.84 Klur tylli ki dieng tynrai la dep ban thung ha kine ki 5 snem kiba la dep, ryngkat bad ban ialeh ban pynjyrngam ia ka jaka kaba 42,000 hektar .U Myntri Rangbah ula iaroh ia ka GREEN Meghalaya+initiative kaba dei ka jingsiew Payment for Ecosystem Services (PES) programme, kaba dei ka jingsiew kaba heh tam hapoh ka ri, kaba la pynneh pynsah ia palat 52,000 hektar ki khlaw lyngba ka jingiashimbynta jong ki shnong ki thaw bad ka jingai jingiarap da ka pisa.

 “Lyngba ka PES, ngi lah iada ia ki khlaw ym da ka jingpahara hynrei da ka jingiatreilang. Kane kadei ka kam kaba kyntang, ka kamram ka jong ngi na ka bynta ka lawei jong ki pateng kiban dang wan” la ong u Conrad.  U la plie ruh ia ka Mission Clean Shillong 2027, kane ka campaign kaban long ha kylleng ki jaka sor kaban iaid ryngkat bad ka National Games 2027. Ka mishon ka long da ka jingthmu ban pynlong ia ka Shillong kum ka nongbah kaba khuid tam hapoh ka ri India.