Slem ka jingpynkynriah ia ki Nongdie Madan namar ka ilekshon MDC

U Myntri ka tnat Tourism u Bah Paul Lyngdoh hynne ka sngi u la ong ba ka jingpynkynriah ia ki nongdie madan na Khyndai Lad kan shim por namar ba dang iaid ka jingpynkhreh iaka ilekshon MDC sha ka Khasi Hills Autonomous District Council (KHADC) bad Jaintia Hills Autonomous District Council (JHADC) ka ban long haka 21 tarik mynta u bnai. Haba kren sha ki lad pathai khubor u Bah Paul u la ong “Haba phai sha ka ilekshon sha ki 2 tylli ki District Council ki iohisar bad ki nongtrei Sorkar naduh u Symbud Myntri Rangbah ka Jylla ba khmih iaka tnat Urban Affair ki hap ban iarap kam ban pynkhreh iaka ilekshon”.

U Bah Paul u la ong ba bun ki tnat treikam Sorkar ki ka don ka jingkitkhlieh bad ki don bynta ban peit iaka jingpynkhreh iaka ilekshon.“Hynrei ka rukom treikam ban kynriah iaki nongdie madan kan dang ïaid beit bad mynta ngi la ïaid shakhmat ruh ban wad ïa ki jaka thymmai na ka bynta kine ki nongdie madan na ka thaiñ Khyndai Lad” u la ong. Haba kylli halor ka jingpyrshah ka kynhun ki Nongdie Madan u Bah Paul u la ong “Kumba nga la ïathuh ïa phi ka kynhun Nongdie Madan ka don bynta ha kane ka kam. Ngi la don ha ka jingiakren kaba man ka por bad ki la shi snem tam.

ka long kaba eh ban pynsngewbha ia baroh hynrei na ka bynta jong ngi kaba nyngkong eh ka long ka jingmyntoi jong baroh ki nongshong shnong, baroh ki nongpyndonkam ia ki surok bad ki lynti iaid kjat”. U Bah Paul u la ong ba ka por kan sa batai, lano yn pynkynriah iaki Nongdie Madan hynrei ïa kane ka rai ruh yn shim hadien bala dep ïa syllop bad baroh kiab don bynta ha kane ka kam.