Ki Myntri sorkar ki Nongmihkhmat lem ki nongialam sain hima bad ki paidbah na kylleng ka jylla ki la iatuid sha Pohkseh, Shillong hynne ka sngi Thohdieng ban leit sngewlem bad ai burom ia u MP ka Lok Sabha u Dr Ricky Syngkon uba la khlad ha ka miet sngi Palei.
Ki paidbah naduh ka por mynstep ki la ia tuid ban leit sngewlem ha Pohkseh kumjuh u Myntri Rangbah ka jylla u Conrad K Sangma, ki Symbud Myntri Rangbah kynthup u Bah Prestone Tynsong bad u Bah Sniawbhalang Dhar, ki Myntri Sorkar, ki MLA bad ki nongialam na ki seng sain pyrthei bapher, ki heh sorkar, ki nongialam bad ki nongkyrshan ka seng Voice of the Peoples Party (VPP) bad ki paidbah na kylleng ki jaka ki la leit sha iing u Dr Ricky ha Pohkseh, Shillong.
Katba ha ka por shibaje mynsngi, la rah noh ia ka met u Dr Ricky Syngkon na Pohkseh ha ka iingsah ha Nongsder, Ri Bhoi District na bynta ban pyndep ia ka jingleh niam ba khadduh ha ka sngi Saitjain. Katba ka kali ba kit ia ka met jong u Dr Ricky ka dang iaid ban leit sha Nongsder la sakhi bun ki paitbah ba ieng harud surok kum ka dak ban ai burom khublei ia u Dr Ricky Syngkon kum u MP ba ki paidah ki ieid bad shaniah.
Hadien ba la poi met u Dr Ricky ha ka iingsah ha Nongsder, la ioh bun ki paitbah kiba ap ki la iam sngewsih kthang ban duh noh ia u nongialam ka jylla bad ka jaidbynriew.
Kum ban shu pynkynmaw u Dr Ricky ula khlad noh ha ka 19 tarik u Rymphang ha ka por janmiet ia kaba la suba jur ba ula ioh ia ka jingpang ‘Heart Attack’ ha ka por ialehkai phutbol ha Mawlai Mawiong.
Ia u Dr Ricky la kha ha ka 6 tarik u Kyllalyngkot 1972 ha Laitumkhrah, Shillong bad ula khlad noh ha ka rta ba 56 snem.
U la pyndep ia ka jingpule bad ioh ia ka kyrdan Master ha ka Economics bad ia ka kyrdan Doctorate ha ka Economics na ka skulbah North Eastern Hill University bad ula hikai ha kane ka skul la palat 20 snem hynrei ha u snem 2023 ula rung ha ka kam sain pyrthei bad iakhun ia ka elekshon MLA na Umsning constituency kum u kyrtong ka Voice of the People Party (VPP) hynrei ula rem noh.
Ha u snem 2024 u Dr Ricky ula iakhun ia ka ilekshon MP Lok Sabha 2024 na Shillong Parliamentary Constituency na ka VPP bad ula jop don burom pyrshah ia u kyrong ka seng Congress ban mihkhmat sha ka iing dorbar Parliament ka ri India.
You may also like
-
Ka jingkhlad noh u Dr Ricky ka jingduh ba khraw jylla bad ka Party : Ardent
-
Ka khubor ba khadduh na u Dr Ricky Syngkon ka long ‘Good Evening Sir’ sngewbha peit ka jingthoh na bynta ka Institute …. ong u Conrad
-
Ïaroh u MLA ka Umsning ba kiew ka roi ka par & ïoh ka kot ka Meghalaya
-
Phah khubor sngewlem ka President, Myntri Rangbahduh bad kiwei ia u Dr. Ricky AJ Syngkon
-
Ym shah u Lamphang ban ïatai halor ka jingbthei bom ha krem dewiong Thangsko