Wat ngeit biej ia ki jingkynthoh, peit ia ki kam ka NPP: Prestone Tynsong

“Wat ngeit biej, ia kita ki jingkynthoh kiba da kumne kumtai ia ka party National People’s Party (NPP), hana ba ka dei ka party High Level bad kumta terter, hynrei ka jingshisha hi, kane ka party kaba lamkhmat ia ka sorkar jylla, ka la nang iohbor bad nang rben snieh doh ban iai trei borbah na bynta ka jingbit jingbiang ki paidbah, ban pynpoi ruh ia ki kam pynroi bapher bapher ban pynmyntoi hi ia ki paidbah jong ka jylla, ong u Bah Prestone Tynsong, State President ka NPP haba kren ha ka jingialang ialap ileksion kaba la long ha Umwang Them, ban pan jingkyrshan na bynta ka kyrtong jong ka party NPP na Nongpoh Konstituensi. Ha kane ka jingialang ialap ileksion ba mynta ka sngi, ki nongialam ba hakhmat ka party NPP, ki la hiar sha ar tylli ki shnong kata ha Marmain bad Umwang Them kaba hap ha Nongpoh Konstituensi, la wan ban ai mynsiem ruh da u Bah HM Shangpliang, Spokeperson, u Bah Clement Mawlong, President ka NPP Ri Bhoi District nalor kiwei kiwei ki heh ka party NPP. Ha ka jingkren paidbah, u Bah Prestone Tynsong u ba dei ruh u Symbut Myntri Rangbah ka jylla, u la pynbna ruh, ba na ka liang ka sorkar jylla ka don ia ka thong ban nang kyntiew ban pynkup bor ia ki Cooperative Society namar ka kyntiew ia ka ioh ka kot jong ki nongshong shnong ka jylla lyngba ka jingdon jong ki Self Help Group, ki Village Organization kaba la pynshitrhem ia ki longkmie kiba don ha kito ki group ban ioh ia ka kamai kajih ba biang, ka sorkar lyngba ka Cabinet Meeting ba la dep la rai ban don noh ia ka Apex Cooperative Society kaban kdup ia baroh ki Cooperative Society ban nang kyntiew ia ki kam ki jam ba ki trei bad kaban kyntiew shuh shuh ruh ia ka ioh ka kot jong ki.

U la ban khia ruh, halor ka jingtreishitom jong ka party ban pynrung ia ki lad pynroi ha kane ka jylla, da kaba ong ruh, ba watla ka Kong Rona Khymdeit kam pat jop ia ka ileksion MDC, hynrei ka la nang treishitom kumno ban pyniajan ia ki paidbah ban pynsuk ban ioh ia kita ki lad ki lynti ha ka liang ka roi ka par lyngba ka jingdon jong ka ha ka party NPP, katno tam lada ka jop kum ka MDC na ka party NPP bad u la pan jingkyrshan da kaba ong, kaban nang pynjan shuh shuh shaduh Secretariat.U la kdew ruh, ba kane ka thain kaba la donkam bha ia u surok ba paka, ha kaba ka la dep ban mang ia ka song pisa ban la pynlait ia ka work order na bynta u surok na Nongpoh-Umden sha Sonapur ba la kot palat 100 klur ha kaba mar ia dep kane ka ileksion MDC yn sdang noh ia ka jingtei ia u surok, ban pynmyntoi ia ki paidbah nongshong shnong khamtam u ne u surok u ban pyniasoh ruh sha ka jylla Assam. Shuh shuh ruh, u la ong, ba lada ki paidbah hi ki dang kwah ba ka jylla lem bad ka jaidbynriew kan nang phyrnai, ai shuh shuh ia ka jingshaniah bad ka bor da kaba jied biang ia ka NPP ha kane ka ileksion MDC ban wan bad ka jingkyrkhu kan long lyngba ki kam shakri bapher bapher khamtam ka roi ka par ha ki shnong ki thaw ha Ri Bhoi District bad ka jylla hi baroh kawei.

Na ka liang ka Kong Rona Khymdeit, haba pan jingkyrshan na ki paidbah ka la khot la wer ia ki da kaba ong, ba ka jied ia kane ka party NPP halor ka jingiohi jngai bad ka jingkhien kaba bniah da kaba pynshong nongrim ruh ia ki kam shakri paidbah ba kum ka party ka la theh bad dei kane ka party kaba tip bad kit ia ka jingkitkhlieh na bynta u paidbah ka jylla.“Nga sngew donbok bha ban ioh ia ka tiket na kane ka party kaba lamkhmat ia ka sorkar jylla, kane ka dei ka sien kaba nyngkong eh, hadien ba la dap shiteng dorjon ba la iakhun ia ka ileksion, kumta nga kyntu bad nga kyrpad sngewbha ban pynkylla noh ia ka kyrteng jong nga na ka Kongrit Rona sha ka Local MDC da kaba pynjop ia nga ha kane ka ileksion ban wan na ka party NPP bad ban long ka jingkieng na bynta u paidbah ha kiba bun ki liang lyngba kane ka party”, ong ka Kong Rona Khymdeit.