Ym hun ka KSU ban pyllait tang ki mark eksam thungkam

Ka Meghalaya Public Service Commission (MPSC) ha ka sien kaba nyngkong ka la sdang ban pynlait paidbah ia ki marks jong ki samla kiba pas ia ki eksamin thungkam. Kane ka jingpyllait paidbah ka MPSC ia ki mark ka long hadien ba ka seng Khasi Students Union (KSU) ka la dawa na ki bor ba halor ka MPSC ba ka dei ban pyntreikam ïa ka kaiphod treikam (report) ba la bthah da ka ‘MPSC Reforms Committee, 2025’. U Asst. General Secretary Cum Chairman ka Employment Monitoring Cell jong ka KSU u samla Reuben Naijar, ula pynkynmaw ba ka seng ha ka 19 tarik u Kyllalyngkot, 2026 ka la phah dorkhas bad la maham ba ka Commission kam dei ban pynslem shuh ban pyntreikam ia kane ka kaidphod bad ka la ai por shi taiew ïa ka MPSC ban pynbeit pynbiang halor kane ka bynta bad na ka liang ka MPSC ha 23 tarik u Kyllalyngkot, 2026 ka la pynlait paidbah ia ki marks jong kiba pass bad ioh kam jong ka post Sub Inspector of Statistics under Directorate of Economics & Statistics.

“Kane ka long ka sien kaba nyngkong ba ka MPSC ka pynlait paidbah ïa ki marks bad ka long kum ka sienjam kaba nyngkong sha ka jingthung kam thung jam kaba khuid,” ong u samla Reuben ha ka kyrwoh khubor. Ula ong ba na ki mat ba don ha ka kaiphod, ka MPSC ka la lah ban pynurlong ïa katto katne tylli ki mat kiba kynthup ban pynlait ïa ki jubab jong ki jingkylli, ban ai por ban pyrshah lada don kano kano ka jingbakla, jingthaw ïa ka Grievances Cell ban ujor lada don kano kano ka jingbakla bad ha ka sien kaba nyngkong ka la pyllait paidbah ïa ki marks bad kiwei ki mat kiba rit. Watla ka MPSC ka la lah ban pyllait paidbah ia ki mark, na ka liang ka seng kam pat hun katba baroh ki mat kiba don ha ka kaiphod, kim pat treikam lut. Katba kiwei pat ki mat kiba ka MPSC kam pat pytreikam ki kynthup ba ia ki eksamin dei ban ai carbon copy jong ki OMR sheet sha ki nongthoh eksamin ba kin ioh ban tip bad ïa nujor ban nym don ba leh tuh bad ki marks ka jong ki, ban pynlait paidbah ïa ka jingdon jingem  man la u snem jong baroh kiba trei ha MPSC ba kynthup naduh u Chairman, ki dkhot bad kiwei khnang ban lah ban teh lakam ïa ka jingbam sap, ban pyntip ïa ki marks jong ka personal interview lada don, ban pynlait paidbah ïa  ka kaiphod treikam (Annual Report) jong ka MPSC, ban don ka Annual Calendar ka ban pyntip ïa ki nongwad kam halor ki tarik advertisement, eksamin bad result na bynta baroh shi snem, jing pynkylla ha ki rukom shim interview, ki jingpynbna lait kam ka dei ban dei thik tang ïa ki nongshong shnong ka jylla bad kiwei kiwei ki mat.

Haba iadei bad kine kiwei ki mat ba dang sahteng, na ka liang u Chairman ka MPSC, u la pan por sa katto katne sngi ban pynbeit pynbiang ïa kiwei ki mat ba dang sah namar ka jing bun ki shuti ha kine ki 7 sngi. Na ka liang ka Seng kan ai por sa katto katne sngi ïa ka MPSC ban pynbeit pynbiang ïa ki mat ba dang sah hynrei lada ym don ki jingkylla kiba biang na ka liang ka Seng kan shim ïa ki sienjam kiba kham eh pyrshah ka MPSC bad lada donkam ban pynsangeh ruh ïa ki eksamin baroh ban nym don ki jingthep tuh bad jingleh tuh katba kine ki mat ba don ha ka report kim pat treikam.