Yn rah ka sorkar ia 6 tylli ki Amendment Bill

Ka Dorbar Mang Tyngka ka jylla Meghalaya kan sdang mynta ka sngi, ha kaba ka sorkar kan wanrah ia ka Mang Tyngka na bynta u snem 2025-26 ban ioh ka jingmynjur ban pyntyllun ia ki kam ha ka jylla. Ka sorkar MDA hapoh ka jingialam u Conrad Sangma ka la pynkhreh ban rah 6 tylli ki Amendment Bill, ha kane ka dorbar mang tyngka ban ioh ka jingmynjur. Kitei ki kynthup ia ka Meghalaya State Investment Promotion and Facilitation Bill 2025, Meghalaya Fiscal Responsibility and Budget Management Act, ka Meghalaya Goods and Services Tax Amendment Bill 2025, ka Water Prevention and Control of Pollution Amendment Act, ka Meghalaya Police Act bad ka  Meghalaya Registration of Birth and Death Amendment Rules. U Myntri Rangbah ka jylla ha ka Sngi Balang ula ong, ka sorkar ka la pynkylla ia ka Meghalaya State Investment Promotion and Facilitation Bill 2025 bad ia kane yn sa rah ha ka iingdorbar thawain.

Halor ka Meghalaya Fiscal Responsibility and Budget Management Act, u Myntri Rangbah ula ong, ia kane ruh la wanrah teng ha ka por jong ka 15th Finance Commission, ia ka Deficit la shah haduh ka 3.5% bad kane ka dei kaba la leh ha baroh kawei ka ri India katkum ki kyndon jong ka Sorkar India bad ka Reserve Bank of India. U Myntri Rangbah ula ong, ba ka sorkar ka la pynkiew ruh ia ka Corpus Fund na ka T.500 Klur sha ka T.1005 Klur bad kane ka long namar ba ka jingbhah tyngka ba la don mynshwa ka duna bha, kumta ia ki kyndon la hap ban pynkiew noh, ka pisa ka don bad ngi hynrei ba ngin ioh ban pyndonkam la donkam ia ki kyndon ha ka mang tyngka. Kumta la thaw ia kane namar ba ngi lah ioh shuh shuh ia ka bhah lyngba ki khajna, ka pisa kaba wan lyngba ki CSS bad kiwei kiwei. U Conrad ula pyntip ba ka Meghalaya Goods and Services Tax Amendment Bill 2025 kadei kaba la ai jingmynjur kaban iaid ryngkat bad ka rai kaba la shim da ka GST Council bad wat ka jingpynkylla ia ka Water Prevention and Control of Pollution Amendment Act la leh da kaba iaid ryngkat lang bad ka ain jong ka Sorkar Pdeng.

Halor ka jingpynkylla ia ka Meghalaya Police Act, 2010, u Conrad Sangma ula ong, ba ka hukum kaba la pynmih da ka Supreme Court kala kdew, “Shisien ba ula shah jied na ka bynta ka kam, u dei ban don ia ka jingtreikam kaba ym duna ia ka ar snem khlem da khein ia ka tarik kaba ula shah jied, kane kadei ka hukum jong ka iingbishar. Hynrei ha ka Police Act kaba ngi la thaw ha u snem 2010 kaba long hashwa ba ka Supreme Court kan ai ia katei ka rai, kumta ia kum katei ka kyndon kam shym la don ha ka Police Act, kaba mut ngi bud ryntih ia ka hynrei ia ka ain donkam ban pynkylla bad ban pynrung ia katei ka bynta ha ka Meghalaya Police Act”. Ula iathuh ruh ba ia ka Meghalaya Registration of Birth and Death Amendment Rules kadei kaba la mynjur khnang ba kan iaid lang ryngkat bad ki kyndon jong ka Sorkar Pdeng na ka bynta ban wanrah ia ka jingpynkylla ban weng ia ka jingbym iahap ha ka kyrteng, tarik ne ka jaka sah.