Shen yn dang ka jingtih katkum ja juk saian: Conrad

U Myntri Rangbah ka jylla u Conrad K Sangma ula ong, ka sorkar jylla ka la pynpaw shai ba ka iengskhem halor ka jingkular ban pynthikna ban sdang ia ka jingtih dewiong da ka jingstad Saïan ne ka Scientific Mining ha jylla Meghalaya.Ia kane u Conrad Sangma ula kren hadien ba u Nongialam ka Liang Pyrshah na seng AITC u Dr Mukul Sangma ula pynpaw, ba ka sorkar jylla kan sdang ia ka Scientific Mining ka dei tang ban plie lad ia ka jingtih bad khaii be-ain ia u dewiong uba don hapoh ka jylla.

Halor katei ka jingkynnoh u Dr Mukul, na ka liang u Conrad ula ong, “Ngam don eiei ban ong, lada dei ba u (Mukul) pyrkhat na ka bynta jong ngi kum ka sorkar, ngi lah kular ban pynthikna ba ka Scientific Mining ka dei ban sdang noh bad ki kam ki jong ngi, ki pyni ba ngi bat ia ka jingkular lym kumta ngin long tang kiba la shu pynsah teng ia ka kam bad ban ym leh eiei kumba la long ha ki por ba la dep”.U Conrad Sangma haba iakren bad ki nongthoh khubor ha ka sngi Balang, ula pynkynmaw ba dei kane ka sorkar ba la iakhun pyrshah ia ka hukum jong ka NGT ban khang ia ka jingtih dewiong.

“Kane ka sorkar ka la iakren bad iatreilang bad ka Sorkar India ban mynjur ia ki jingbthah bad ia ki kyndon ban pynthikna ba ki par jong ki riew shimet kin ioh ia ki Mining Plan bad ka sorkar ka la plie lad ia ki kam baroh ban wanrah ia ki kynhun ba tbit ban pynurlong. Kumta ka jingleh jong ngi, ka pyni ia ka jingkular ban pynthikna ba ngin lah ban sdang ia ka Scientific Mining khnang ba ki kam kin iaid shakhmat” la ong u Conrad bad bynrap lada don ki riewshimet kiba don da kawei pat ka rukom pyrkhat ka dei ka jingpyrkhat shimet, hynrei ka jingthmu jong ngi, ka long shai kdar ia ka kam ba ngi trei bad ngi lah sdang ban ioh ia ka resol ia ka kam ba ngi lah trei.