U Myntri Rangbah ka jylla u Conrad K Sangma, ula pynbna ba ka sorkar jylla mynta u snem ka la pynkreh ban pynlong ia ka tamasa Cherry Blossom 2025 ha nongbah Shillong. Kane ka tamasa Cherry Blossom kan long ha ka 14 bad 15 tarik Naiwieng, 2025. Ia kane la pynbna da u Myntri Rangbah ha ka jingrakhe ia ka World Music Day kaba long ha Lariti Auditorium, Mawkasiang. Ha kane ka tamasa, ka sorkar jylla ka la pynkhreh ruh ban khot ia uwei na ki nongrwai ba pawnam ka ri u Jason Derulo uba dei u nongrwai R&B na Miami, USA nalor kiwei de ki nongput nongtem kiban wan ban pynshongshit ia kane ka jylla.
U Jason Derulo mynta u snem un wan ban pynkynniuh ia ka nongbah Shillong, da ki jingrwai ba paw ba khring jong u kum ka jingrwai Swalla, Talk Dirty, Savage Love ha Shillong ha ryngkat ki 15 ngut ki nongshad. Kum ban shu pynkynmaw mynshem snem u 2024, u nongrwai Akon, BoneyM nalor kiwei de nongrwai rapper, ki la wan ban pynshongshit ia kane ka jylla ha madan Kurkalang,Ri Bhoi.U Myntri Rangbah ula ong ba mynta u snem, ka tamasa kan kham pynleit jingmut ha sor Shillong da kaba pynlong ia kiba bun ki tamasa ban pynbyrngia bad ban pyni ia ki kolshor ka Jylla.
Ula ong ba ka Cherry Blossom 2025 kan ym kut tang kum ka tamasa hynrei kan iarap ban kyntiew bha ia ka ioh ka kot ka Shillong bad ka jylla hi baroh kawei bad kan khring ruh ia ki kam jngohkai bad ka jingithuh ha ka pyrthei. Ula ong ba ia ki kynhun nongput nongtem yn sa pynbha kham hadien ha kaba ki nongpyniaid kila kular ba ki kynhun kin dei kiba la pawnam bad kiba tbit. Ka jingdie ia ki ticket kan sdang haka taiew ba khatduh jong u Jylliew,2025 bad lah ban ioh ia ka tang na ka www/RockskiTickets.com.