Pynibor ki nongshong shnong ba khot pyrshah Dorbar tang ki 17 kur ha shnong Tynring

Ka la mih ka jingiapynibor bad iarah kti hapdeng ki nongshong shnong ba pyrshah ia ka jingkhot pynlong Dorbar tang da ki 17 kur jong ka shnong Tynring East Khasi Hills.

Kane ka jingiakulmar ka mih na ki paidbah nongshong shnong ka Tynring ki bym shah khot ha ka Dorbar Shnong Shnad Raid Tynring bad bym kynthup ha ka 17 Kur kumba la khot ka Dorbar Shnong.

La kynnoh ba ki nongialam Shnong ka Dorbar Shnong Tynring ki la khot bad pynlong ia ka Dorbar Shnad Raid Tynring kaba la khot tang ia ki 17 Kur lait na kita ki bym shah kynthup ha ka 17 kur kiba dei nongshong shnong ka Tynring ki la shah kyntait bad ym shah ban shnong ha Ka Dorbar.

Katkum ka jingtip ba la ioh ba kane ka kam huri hura ki 17 Kur ka dang sahteng ha ka Ophis u Syiem khyrim bad District Council.

Naka liang u Sordar jong Shnat Raid Tynring u Bah Wordington Nongrum u la ong ba ha ka step jong ka 30 tarik Lber 2026 u la lum ia ka Dorbar shnong ban pyrshah ia ka ban pynlong ia ka Dorbar pyllun ka ban long ha 31 tarik Lber 2026.

U Bah Wordington ula ong ba ka shnat Raid Tynring ka pyrshah ia ka hukum ba la pynmih da ka District Council ha 27 tarik lber kaba bthah ia u Syiem ban lum ia ka Dorbar Pyllun ha shnong Tynring ha ka 31 tarik lber 2026 ha ing Dorbar shnong Tynring da kaba kynnoh ba kane ka jingleh jong ka District Council ka dei ka jingïuhroit ia ka hok jong ka shnat raid tynring.

“Na ka liang jong ngi ngim lah ban tip ia ka jingthmu jong ka District Council ban pynlong ia ka Dorbar, namar hangne ngi don ia ka sanat na u Syiem ka Hima Khyrim ban peit ia ka synshar khadar” la ong u Bah Wordington.

U Bah Wordington ula ong ba na ka liang ka shnong kan nym ailad ban pynlong ia ka Dorbar kumba la bthah ka District Council ia u syiem jong ka Hima Khyrim Syiemship.