Dawa ki Synjuk Ki Trai bad Nongniah ban kem ia u briew ba shoh ia nongniah Sumo

Ka Synjuk Ki Trai bad Nongniah kali ka Bri u Hynniewtrep hynne ka sngi ki la leit buh shithi sha ophis jong u Superintendent of Police (SP) ka East Khasi Hills ban dawa ba dei ban kem mardor ia uto u briew uba shoh ia u Draibar niah Sumo ha ka miet jong ka 29 tarik Lber, 2026.Ka Synjuk ka la dawa ruh ba ki pulit kidei ban knieh noh ia ka lisen rah suloi jong u namar ha katei ka sngi ula byrthen da kaba sei suloi, bad lada dei ba um don ia ka lisen kidei ban pynngat ia u hapoh ka ain jong ka Illegal Arms Acts namar ba ula pynkhein ia ka ain.Ha shwa kane, ka Synjuk kaba kynthup ki nongniah kali kamai trok, taxi, Sumo, Ar shaka ki la lum jingialang ha phyllaw jong u Soso Tham ban pynpaw ka jingpyrshah jur halor kane ka jingjia ba shah shoh u Draibar niah Sumo.

Haba kren ha kane ka jingialang, ki nongialam ki nongniah kali kamai, ki la pynpaw ka jingpyrshah jur bad ki la dawa ba ki bor pulit kidei kiba leh da kaba tyngeh ban pynshitom ia une u briew, khnang ba kan long ka jingsneng hadien habud ia kiwei ruh.Ha kajuh ka por ki la dawa ruh ba une u briew udei ban pynmap lyngba ki lad pathai khubor bad ha khmat ki Draibar niah kali baroh.

U nongialam ka Synjuk u bah Balajied Jyrwa haba kren sha ki lad pathai khubor, ula pynpaw ka jingkhmih lynti ba ki bor ba halor kin shim khia ia ki mat jingdawa jong ka Synjuk.U bah Balajied ula ong ba lada ki bor ba halor kim shimkhia bad kim leh eiei pyrshah ia une u briew, ka synjuk kan sa shim da kiwei pat ki sienjam jong ki jingiakhih.