Ha ka jingjia shah lute ATM, kawei ka kor sei pisa kaba dei jong ka Meghalaya Cooperative Apex Bank, Lumdaitkhla Bhoirymbong ka la shah kyndang ha ki nonglute bym lah ban ithuh dur kiba la ioh ban rong tuh ruh ia ka pisa kaba la kot haduh Hynniew Lak Hynniewphew Hynniew Hajar bad Sanspah tyngka (7,77,500).
La ioh jingtip ruh, ba ki snar nonglute ki bym lah ban ithuh ki dei kiei, ki la leit ban phrong tuh ia katei ka ATM kaba don na Lumdaitkhla Bhoirymbong ha ka por shiteng synnia jong ka 5 tarik Iaiong da kaba pyndonkam ia ki tiar ban shu thang bad ot ia ka tala jong kane ka ATM ban iohrung shapoh bad ban tuh ia katei ka pisa.
La iathuh, ba ia kane ka jingshah tuh katei ka ATM la lap da u nongap pahara jong kane ka bank ha ka por 8 baje eiei mynstep ha ka 6 tarik Iaiong hadien ba u la leit ban plie ia kane ka ATM hynrei la lap pynban ba kane ka kor sei pisa kaba shah lute lut ki pisa ba la buh ha kane ka kor.
Na ka liang u Branch Manager jong katei ka bank u la ujor da ka ejehar ha Umroi PIC kaba hap hapoh ka Umiam Police Station ha kaba la rejister mukotduma katkum ka Umiam PS Case No. 20(4)2026 under sections of the Bharatiya Nyaya Sanhita (BNS), including Sections 305(a), 331(4), 324(5), 61(2)(b), and 3(5).
Halor kane ka jingjia shah lute katei ka ATM ha ka thaiñ Bhoirymbong kaba la iai jia na ka por sha ka por, na ka liang ki pulit ki la sdang ban pynlong ia ka jingtohkit bad ban thwet ia ki snar nonglute kiba donkti ban tuh ia kane ka ATM.