Ym pat ioh jingtip ka NPP Nongpoh ia ka jingthmu pyniasoh u bah Mayral Born

Hadien ba la saphriang sted ka khubor halor ka jingthmu ban pyniasoh noh u Bah Mayral Born Syiem MLA ka Nongpoh Constituency sha ka party National People’s Party (NPP) bad ban iakhun ia ka election MLA na ka tiket jong ka party, mynta na ka liang ki nongialam ka NPP Nongpoh Block ki la pynshai ba halor kane ka khubor kim pat don jingtip eiei bad kam pat don kano kano ka jingiakren halor kane ka phang.

Ki nongialam ka NPP Nongpoh Block ba kynthup ia u Bah Henry Nongrum kum u President bad u Bah Bishar Tmung, General Secretary, ki la pynshai lyngba ka kyrwoh, ba kum ki nongialam bad ki dkhot ka party NPP kim pat don jingtip ne ioh khubor eiei ha kaba ia dei bad ka jingthmu pyniasoh u MLA ka Nongpoh Constituency Bah Mayral Born Syiem sha ka party NPP.

Ki la iathuh ruh, ba ha kaba ia dei pat bad ka ticket na bynta ka election MLA kaban long ha u snem 2028, na ka liang ka Block hi kim pat ia kren satia namar tad haduh mynta kum ki nongialam bad ki dkhot ka party ki dang iai treishitom ban nang pynkhlain ia ka party hashwa kane ka election bad ki la bynrap ruh, ba haduh mynta hi ka Block hi ka don ia ka MDC ka Kong Rona Khymdeit kaba la jop don burom ia ka party ha ka election MDC ba la long ha u snem 2025 da ka jingtrei shitom ki nongialam, ki nongkitkam bad ka jingshaniah jong ki paidbah.

Shuh shuh ruh, ki la pynpaw, ba ha ka ia dei bad ka jingrai ia ka ticket na bynta ka election MLA kum ka Block ka kyrmen skhem ba na ka liang ki nongialam jong ka NPP State Level kin sngap bad kin pdiang ia ka rai jong ki nongkitkam jong ka Block, kiba la ia trei shitom hapdeng ka saw ka sian ban pynjop don burom ha ka election MDC ha u snem 2025.