La Rakhe ïa ka ktien Khasi kum ka Ktien Sorkar da kaba Adkar

Ka Khasi Authors’ Society ka la pdiang shitrhem da jingkmen ia ka jingpynbna jong ka sorkar jylla ban pynlong ktien sorkar pura ia ka ktien Khasi ryngkat bad ka ktien English bad Garo. Kane ka jingkyntiew kyrdan ia ka ktien Khasi kan sa pynsuk na ka bynta ban khajoh sha ka kyrdan ban ioh jingithuh ia ka ktien Khasi ha ka Khyrnit Baphra jong ka Riti Synshar ka Ri India.
Ka jingpynbna ka la saphriang shitrhem sha baroh kawei ka Ri Khasi naduh thaiñ Lyngam shaduh Jaintia, naduh thaiñ War shaduh Ri-Bhoi, khamtam ha ka shnong Sohra ha ka ba la pdiang salonsar ia ka ktien Sohra kum ka ktien pdeng ha satlak ka Ri Khasi. Ki nonglam na ki shnong ki sengbhalang, ki khlieh nongsynshar bad ki riewstad thohkot thohsla ki la kren shitrhem bad pynpaw la ki jingsngewkmen ba ka ktiebn Khasi ka la rasong sha ka kyrdan bakhraw ha jylla bad ki la iai ban ban iakhun tyngeh haduh ban da ioh jingithuh syndon ha ka sorkar kmie ha Ri India. Barohj ki la ia risa leh kmen ba u mawjam bakhraw tam la urlong hadien ba ka Khasi Authors’ Society ka la iakhun tyngeh da ki phew snem naduh ba la seng ia ka synjuk ki nongthohkot Khasi ha jylla.
Ki ba la ai jingkren ha katei ka sngi ki long u Bah Banlam K. Lyngdoh na ka KAS Shnat Sohra; Bah Dapbiang Warjri, President of Seng Samla Saitsohpen; Kong Ribashisha Kharwanlang, President of Seng Kynthei Mawmluh; Pabok Diengdoh, Education Secretary jong ka FKJGP Sohra Circle; Dr K. D. Ramsiej, Vice President ka KAS sengkmie; Reebokstar Diengdoh, President, KSU South West Khasi Hills; Marremdor Syiem, Syiem Khynnah ka Hima Sohra; Titostarwell Chyne, MDC Sohra; bad Dr D. R. L. Nonglait, President KAS Sengkmie.
Baroh ki nongkren ki la pyrto ba ia ka jingangnud jong ki paidbah ha jylla la lah ban pynurlong, wat ha ba ki mawjam ba dang dei ban kiew irat shuh shuh ki dang ap na ka bynta ban poui sha kliar jong ka kyrdan ba shong hok ia ka ktien Khasi.
Ha ka jingkren ba sani, ba bniah bad ba shong sbai jong u khliehduh ka Synjuk ki Nongthohkot Khasi, u Dr Nonglait u la kynpham ia baroh ban husiar katba ka kam kam pat lah ban long pura haduh bad da soi bad shon shab da ka muhor jong u Lat ka jylla. Jar la katta u la pynpaw ba ka don ka jingkyrmen wat hapdeng ki kynpeiñ ki ba jwat ba dang dei ban ia aireng khnang ban lah khajoh shaduh sha kliar jong ka nam ka burom ba dei hok ia ka ktien Khasi. U la kyntu ba naduh ki paidbah haduh ki riewtbit ha la ki kam bapher bapher ki la dei ban pynkhreh ia ki kot katkum ka phang jingtip baroh ki ba dei ban pule ha ki shlem pule ne ha ki shlem thung kam thung jam, lane wat ha ki kyrdan pule ki ba hakliar kum ha ki skulbah ki salonsari, ym tang ha jylla hynrei wat sha satlak ka Ri India bad ha kylleng ka pyrthei.
U Dr Nonglait u la kynpham shuh shuh bad maham da ka sur ka ba jemnud ba dei ban long ki ba la khreh na ka bynta ban pynbiang ia baroh ki jingdonkam jong ka ktien Khasi ha ka ba pyndonkam ha manla ki bynta jong ka pule dangle, ka kamai kajih, khaii pateng, ka rukom pyntbit ha la ki rukom rukom ba lah ban ioh jingtip da la ka ktien kmier lajong kata da kla ktien Khasi.
Kumta ka long ka ba donkam ba dang dei ban duriap bad iai minot da manla iwei-pw-iwei na ki paidbynriew Khasi ban long ki ba tipthuh ha la ka bynta jong ka kam na ka bynta ba ka ktien Khasi kan long ka atiar ka ba myntoi ia ki pateng longdien ha ka lawei bad ban iaineh ka jingiakhun haduh ban da jop thiaw.