Ïakhih shong kyllaiñ mungor ka MECS halor ka jingkhlad ki shipara ha Manipur

Ka Manipuri Elders’ Consortium Shillong (MECS) hynne ka sngi ki la pynlong ia ka jingshong kyllain mungor ha Don Bosco ban pyrshah bad ban pynrem jur halor ka jingshah pyniap ki arngut ki shipara ha ka jingjia dang shen ha Manipur. Haba kren sha ki lad pathai khubor, ka President ka MECS ka T.S. Leima ka la ong ba kane ka jingiakhih la pyllong ban pynrem jur ia ka jingshah pyniap jong arngut ki heprit kynthup uwei u shynrang ba 5 snem bad ka para kynthei ba dang 5 bnai.

Ka MECS ka la pynpaw ka jingsngewlem ia kane ka longiing bad ka pynrem jur ia kane ka jingjia namar katba u kpa jong ki u dang ai ka jingiada ia ka ri namar u trei kum u shipai hapoh ka Border Security Force bad katba ka kmie ka dei ka Nurse kaba trei ha Apolo Hospital Guwahati, kine ki khun kila khlad ha ka jingshah ther ha u Roket ha iing sah jong ki ha ka 7 tarik Iaiong, 2026. Ka Leima ka la kyntu ia ka sorkar India ba kadei ban shim ia ki lad ki lynti ban wanrah biang ia ka jingsuk bad kadei ban pynshitom ia kiba donkti ban pyniap ia kine ki heprit. 

Ha kajuh ka por ka la kyntu ia ka sorkar ba kadei ban leh eiei halor ka jingrung beain ki briew ha katei ka jylla bad ka jingkiew jong ki nongdih droks, kaba ialam sha ka jingbym don ka jingshong suk shongshngain. Ka la kyntu ruh ia ki bor ba halor ba kidei ban pyntikna ban don ka jingshngain ia ki jaidbynriew Meitei kiba iaid ba ieng ha ki surok bah ha Manipur. Ka kynhun kynhun ka la ong ba kan iai pyllong ia ka jingiakhih ba jai jai , lada donkam khnang ban wanrah ka jingbishar hok bad ka jingshongsuk shongshngain.