Thaw history ka sorkar MDA, mynjur ban pynlong “Official Language” ia ka ktien Khasi bad Garo

Ka kynhun Myntri hynne ka sngi ka la rai bad mynjur ban pynlong ia ka ktien Khasi bad Garo kum ki ktien sorkar (Official Languages) ryngkat ka ktien Phareng (English) bad kane ka rai kan long ka histori ban sah kynmaw ia ka jylla bad khamtam ia ki jaid bynriew Khasi-Garo ha ki pateng ban wan.

Lah ban ong kane ka rai jong ka kynhun Myntri Sorkar kan dei ka sienjam ban wanrah ia ka jingkylla ba khraw ha ka rukom pyniaid ha ki ophis bad ki kam ka iing Dorbar Thaw-aiñ, ryngkat ka jingpynskhem ia ka jinglong tynrai jong ka jylla.

U Myntri Rangbah ula ong, ba kynhun Myntri Sorkar ka la mynjur ia ka Meghalaya Official Languages Ordinance 2026, kaba la pyndam noh ia ka aiñ barim kata ka Meghalaya State Language Act 2005.

U Conrad ula ong ba lyngba ka Ordinance ba thymmai, ka ktien Khasi bad Garo kin long noh ki ktien Sorkar (Official) ha ryngkat bad ka ktien Phareng (English) bad kane ka sienjam kan ai lad ia ka Sorkar ban pyndonkam ia kine ki ar tylli ki ktien ha ki kam Sorkar.

“Ka kynhun Myntri hynne ka sngi ka la shim ka rai ban sah khana bad mynjur ia ka Meghalaya Official Languagres Ordinance 2026, ban pynkut noh ia ka Meghalaya State Language Act 2005, ka ban nang pynbha ia ka jingtreikam trei jam baroh bad kumjuh ruh ki lad ki ban plie khamtam ia ki samla jong ka Jylla bad kan iarap ha ka ban kyntiew ia ka ktien ka thylliej jong ngi” ong u Conrad.

“Ha ka Meghalaya Official Languages Ordinance 2026, ka mat ba kongsan ka long nangne shakhmat nalor ka ktien English, ka ktien Khasi bad Garo ruh kin long noh ki Official Language ha Jylla” ula bynrap.

U Myntri Rangbah u pyntip ha ka por kaba biang, yn sa wanrah ruh ia ka jingpynkylla ia ki Ain, kum ka Meghalaya State Legislature (Continuation of the English Language) Act, 1980.

“Shisien ba la pynkylla, kan ai lad ia ki nongthaw ain jong ngi ba kin kren bad iatai nia ha ka ktien Khasi bad Garo nalor ka English ha ki Dorbar ha Iingdorbar Thaw Ain” ula bynrap.

U Conrad u iathuh kane ka rai kan treikam ruh na bynta ki competitive examination. “Kane ka rai kan plie lynti lad ruh ban pynlong ia ki eksamin bapher ha ka ktien Khasi bad Garo nalor ka English” bad bynrap “Hynrei, ka jingpyntreikam kan iaid da ki bynta bynta”.

“Kane kan ym jia mar mar, ka jingpynkhreh ia ki jingdonkam baroh kan shim por. Kin don ki rai kiba suk ban pyntreikam mardor hynrei ki don ruh ki rai ba donkam ban pynkhreh, ki briew kiba hap thung katkum ki rules ba hap thaw. Hynrei kane ka rai mynta ka sngi kan ai lad ia trai jylla” ula pynpaw.

U Myntri Rangbah ula pyniasnoh ia kane ka Ordinance bad ka jingdawa ba la slem bha jong ka Sorkar ban ai jingithuh ia ka ktien Khasi bad Garo ha ka Eighth Schedule.