Lah pynieng kyrtong ka NCP na ka bynta ka ilekshon MP shiteng samoi

Ka Nationalist Congress Party (NCP) ka lah ban pynieng kyrtong ban pyniakhun na bynta ka ilekshon MP shiteng samoi sha Lok Sabha na Shillong Parliamentary konstiwensi.
Haba kren ha ka jingialang ba long hynne ka sngi ha State Convention, Shillong, u State President ka NCP u OK Sangma ula ong ba ka party ka la don lypa ia u kyrtong hynrei mynta ka dang pyrshang ban pynkonguh shwa ia ki nongialam ka seng kmie ba kin pdiang ban pyniakhun ha kane ka ilekshon.
“Ngi la don ia u kyrtong ban iakhun ia ka MP ilekshon shiteng samoi, hynrei ngi donkam ban pynkohnguh shwa ia ki nongialam ka seng kmie ba kin mynjur ban pyniakhun ha kane ka ilekshon,” ula ong.
Ula kyntu ia baroh ki nongkitkam bad ki nongkyrshan ba kin trei shitom ban pynkhlain ia ka party ha man ki jaka jong ki kyndong kynshrot ha ka jylla.
Ha kajuh ka por, ula pyntikna ba ha u 2028 ka NCP kan sei ia ki kyrtong ban iakhun ia ka ilekshon MLA ha utei u snem.
Ula ong ba bun ki pyrkhat ba ka NPP kaba don ha ka bor ka la suhthied ha rilum Garo hynrei ula pynshai ba kane kam dei kumta bad bynrap ba na bynta ka ileskhon MDC sha GHADC, ka NPP ka la pynjlan noh ia ka samoi ilekshon namar ba ka sheptieng ioh ka rem.
Katba na ka liang u National Youth President jong ka NCP u Dheeraj Sharma, ula ong ba ka NCP ka dei ka seng kaba la long tynrai ha Meghalaya kam dei shuh ka seng kaba dang thymmai ha ka jylla.
U la ong ba ka seng mynta ka la sdang ban pynkhlain ia ka khamtam ba ka ilekshon sha iingdorbar thawain jong ka jylla kan sa long ha u snem 2028, ha kaba ka seng ka phai khmat sha ki samla bad ki don ka jingkyrmen ba ki samla na ka jylla Meghalaya kin ai ka jingkyrshan ia ka Seng.
“Ngi la sdang ia ka jingpyniasoh sha ka seng, ki don ka jingkyrmen ba ki samla na ka jylla kin kyrshan namar kumba ka long mynta shibun ki samla ki ia kynduh jingeh ha ka ioh kam ioh jam , ka jingngop ha u Drok bad ka seng kan phai khmat sha ki samla ban peit ia kane ka jingeh kaba ki ia kynduh,” ula ong.
Shuh shuh u la bynrap ba ka NCP ka dei ka seng kaba phai khmat sha ki samla, u Myntri Rangbah ka jylla Meghalaya ruh u dei u National President barim jong ka NCP, U MP ka Meghalaya ruh u dei u nongialam barim jong ka NCP , ka seng ka dei kaba ithuh ba ka dei ka seng kaba phai khmat sha ki Samla.