Phah tohkit u Myntri ba iap 2 ngut na ka jingtwa maw ha Mawlieh

U Symbud Myntri Rangbah ka Jylla u Bah Prestone Tynsong uba peit ia ka tnad PWD Road & Buildings hynne ka sngi, ula bthah ban tohkit ia ka jingjia twa khyndew bad hap ki mawbah ha Mawlieh haduh ba ar ngut ki briew duh ei ia ka jingim hynnin ka sngi.

Ki ar ngut ba la khlad ha kane ka jingjia twa ki maw ha Mawlieh la ithuh kyrteng u Bah Wanbor Nianglang 40 snem na Pynursla bad u Bah Nangteibor Khongthohrem 46 snem na shnong Lumwahniai.

Haba iakren bad ki nongpathai khubor u Bah Prestone Tynsong ula ong, ka long ka jingjia ba sngewsih ba ar ngut ki briew ki la duh noh ia la ka jingim na ka jingshah ban ki maw ia ka kali Pick-Up ba ki shong.

U Myntri ula bthah ia u SDO Civil bad ki pulit hapoh ka jingialam u SDPO Pynursla, ka kompani NHIDCL ba pyntrei ia ka projek ban peit bniah halor ka jinghap ki mawbah kaba la wanrah ka jingduh ia ar ngut mynsiem briew.

U Bah Prestone ula ong, ki ophisar ka PWD ryngkat bad ki bor district hynne ka sngi ki la hiar jurip ia katei ka jaka bad la rai ba dei ban khang shwa shipor ia ka surok kumba 2-3 sngi.

“Nga kyrpad ia baroh khamtam ki paitbah na Pynursla Constituency ba kin shah shitom shipor, namar bym shngain ka leit ka wan iaid lyngba katei ka jaka. Kumta nga kyrpad ia ki paitbah ka thain Pynursla ban iatreilang bad ai ba ki bor district kin shimkhia halor kane ka mat” ong u Bah Tynsong.

Ula bynrap ka don ka jingpyrkhat ban shim shuh ki jaka ha katei ka bynta, khnang ba yn lah ban pynkhuid ia ka jingtwa khyndew.