Shah kem 15 ngut ba suba pyniap ia u Rangbah ha EGH

Ki pulit ka East Garo Hills ki la kem ia 15 ngut ki briew ba suba donkti pyniap ia uwei u rangbah ha ka shnong Dagal Nachikol, East Garo Hills.

U Superintendent Police (SP) ka East Garo Hills u Bah S Rynjah, ula pyntip ba ki pulit ki la shimkhia mardor ia kane ka jingjia, hadien ba ki pulit jong ka Songsak Police Station ki la ioh pdiang ia ka ejahar ba ka la mih ka jingkulmar ha ka por 11 baje mynstep ha ka 8 tarik u Iaiong 2026, ha kaba uwei u briew uba la tip kyrteng kum u (L) Talseng T Sangma, uba sah ha Dagal Nachikol ula shah thombor ha ka kynhun ki briew hapoh ka iingsah jong u.

U Talseng ula mynsaw jur na ka jingshah thombor bad ula khlad noh ha shiteng lynti ban leit sha Civil Hospital, Williamnagar ban ioh ia ka jingsumar.

U SP ula ong, “Na ki 16 ngut kiba la suba donkti kiba la jer kyrteng ha ka ejahar, ngi lah ioh kem ia ki 15 ngut. Ka jingthwet ki pulit ka dang iaid shakhmat ban kem ia kiwei pat kiba donkti ha katei ha ka kam bymman”.

U la iathuh kitei ki nongthombor ki la leit rung be-ain ha iing ryngkat ka byrngem ban leh da kaba tyngeh ia kiba haiing ba hasem jong u Talseng.

Ki pulit ki la rejistar mukotduma ia kane ka jingjia hapoh ka Songsak PS hapoh ki kyndon 103(1)(2)/329(1)(3) BNS bad baroh ki kam ba ia dei bad ka aiñ bad ka jingleh ia ka Post Mortem la pyndep bad ka jingtohkit mynta ka la dang iaid shakhmatpayrhah ia ki 15 ngut bad ka jingthwet ia kiwei ka dang shakhmat.

Ki pulit ka East Garo Hills District ki la kyntu ia ki paitbah ba kim dei ban pynsaphriang ia ki khubor hamsaia bad kim dei ban ym ngop ha ki khubor hamsaia namar ka dang don hapdeng ka jingtohkit.

La kyntu ia kino kino ba don jingtip shaphang katei ka jingjia ba kin pyntip sha ka Police Control Room ha ka mobile nombar 8794765696 bad 6009841060.