Rai ka sorkar ban pyllait ia u Lumpongdeng na ka project 7 star Hotel, weng ka GTF ia ka jingiakhih shah thngan

Ka Sorkar Meghalaya hynne ka sngi ka la rai ban pyndam noh ia ka project jong ka tnat Tourism ban tei 7star hotel Lumpongdeng, Umiam Ri Bhoi District.

Ia kane ka rai la pyntip da u Myntri Sorkar u ba dei ruh u Nongaiktien ka Sorkar MDA u Bah Wailadmiki Shylla.

Ia kane ka rai la shim ha ka jingialang ba la lum da u Symbud Myntri Rangbah u Bah Prestone Tynsong ha ka jingialang ka Synjuk Ki Rangbah Shnong Ri-bhoi District (SRSRB), ka Director jong ka tnat Tourism.

Haba kren sha ki lad pathai khubor u Bah Wailad ula ong, ba wat la ka Sorkar ka la weng noh ia u dewlynnong Lumpongdeng hynrei ka company Taj kan iaid shakhmat ban tei ia ka 7 Star Hotel ha ka jaka ba don ka Orchid Umiam.

U Bah Wailad ula ong ba watla ka Sorkar kam don jingthmu ban tei jingtei ha Lumpongdeng hynrei namar ka jingsngewkhia ki paidbah khamtam, ka Green Tech Foundation, ka Sorkar ka la rai ban pynmih syndon daka jingthoh ba ka Project kam dei ban ktah ia u dewlynnong Lumpongdeng.

“Ka project 7 Star Hotel kan dei beit tang ha ka jaka ba don ka Orchid Umiam bad kan nym ktah ia u dewlynnong Lumpongdeng” la ong u Bah Wailadmiki.

Haba kyrpad ïa ki dkhot jong ka Green Tech Foundation ban weng noh ïa ka jingshah thngan jong ki, u Myntri Sorkar ula ong “Ngi kwah ban kren shai ba ka Sorkar kam don kano kano ka jingthmu ba rieh halor kane. Ngi long kiba skhem bha halor kata. Kumta ngi kyrpad ïa ki dkhot ka GTF ba kin weng noh ïa ka jingshah thngan jong ki namar ba ngi la sngap ïa ka jingdawa jong phi.”

Ha kajuh ka por, ka Green Tech Foundation (GTF) hynne ka janmiet ka la pynbna ban weng noh ia ka jingiakhih shah thngan hadien ba ka Sorkar ka la ai da ka jingthoh ba la weng noh ia u dewlynnong Lumpongdeng na ka Project 7 Star Hotel ban tei ha Umiam.

Lah ban kdew ba 2 ngut ki nongialam ka GTF ki la pynlong ka jingiakhih da kaba shah thngan ha Madan Malki ban pyrshah ia ka projek ka tnat Tourism ha Lumpongdeng.

Ia kane la pynbna da u Chairman ka GTF u Bah H Bansiewdor Nonglang hadien ba ula wanphai na Woodland Hospital.

Haba pynbna iaka rai, u Bah Bansiewdor ula ong ba ka Sorkar kala pyndem ym haka GTF hynrei haki paidbah baroh kiba pyrshah ban tei Resort bad Spa ha u dewlynnong Lumpongdeng Umiam.

U Bah Bansiewdor ula ong ba kane ka rai jong ka Sorkar ban weng noh ia u dewlynnong Lumpongdeng naka Project 7 Star Hotel ban tei ha Umiam ka pynthikna biang ba u Lumpongdeng udei jong ki paidbah bad jong ka pateng ban wan.

“Hadien ba ngi la ioh pdiang iaka shithi naka Sorkar baka la weng weng noh ia u dewlynnong Lumpongdeng naka Project 7 Star Hotel ban tei ha Umiam, namar kata naduh mynta ka janmiet ngi la rai ban weng noh iaka jingiakhih bad ngin leit phai noh shala iing” la ong u Bah Bansiewdor.

“Ki ummat ba jaw, ki jingpait dohnud, 12 ngi ka hingshah thngan, 20 tylli ki Drip, ngi la ioh iaka jingjop. Ki lah pyndem” ula ong.