Iakynduh u MR ia ki nongialam ka KAS, pyntip ka sorkar kan ithuh ia ka Khasi bad Garo

U Myntri Rangbah ka Jylla u Conrad K Sangma hynne ka sngi ula iakynduh bad pynsngew ha ki nongialam jong ka Khasi Authors Society (KAS) ba ka Kynhun Myntri ka la shim ia ka rai ban kynthup ia ka ktien Khasi bad Garo kum ka Official Language ne Ktien Sorkar ha ka jylla nalor jong ka ktien Phareng ne English.

U Myntri Rangbah ula pynapw ba watla ia ka Resolution la mynjur hapoh ka Meghalaya Legislative Assembly ban kynthup ia ka ktien Khasi bad Garo ha ka Eighth Schedule, kumta ka long kaba donkam ban phah ia ka kyrwoh kaba khlain sha ki paitbah ka jylla bad sha ka Sorkar Pdeng ia ka jingkongsan ban kyntiew ia ki ktien tynrai ha baroh ki kyrdan bad ia ka mat ban kynthup noh ia kitei ki ktien ha ka Eighth Schedule jong ka riti synshar ka ri.

Ula ong, watla ki kam ki jam ban wanrah pura ia kine ki ktien ha ki kam sorkar, ki jingphah ia ki jingthoh bad ka jingpynlong ia ki eksamin, kin shim por hynrei la shim ia ka rai ba ka rukom treikam ban pdiang ia kitei ki ktien.

U Conrad ula ong, ba ha ka Dorbar Synrai ki nongthaw aiñ ka jylla kin ym pat ioh ban kren ne iatai ha kitei ki ktien, hynrei kan long kaba iahap bha ban don ia ka Dorbar Synrai ha ka iingdorbar ba thymmai ha kaba ka jingiatai kan long ha ka ktien Khasi bad Garo.

“Ngi donkam iaka jingkyrshan ka jong phi ban pynthikna ba kane ka rai kaba ngi lah shim, kan dei kaba lah ban pyntreikam pura bad kan wanrah ruh ia ka jingkylla kaba donkam” la pynpaw u Conrad haba pan ia ka jingkyurshan na ka KAS bad ka ong ba ka jingshim ia kane ka rai kan nang pynkhlain ia ka jingdawa ban kynthup ia ka ktien Khasi bad Garo ha ka Eight Schedule jong ka riti synshar ka ri.

U Myntri Rangbah ula ai khublei ia ka Khasi Authors Society bad ka Achik Literature Society kila maitphang b ad pynlong ia ka sorkar ban shim ia katei ka rai kaba kongsan bad ula pan ruh ia ka jingkyrshan na ki.

Ha kane ka jingiakynduh bad ki dkhot jong ka KAS, la iadonlang ki Symbud Myntri Rangbah ka jylla kiba kynthup ia u Bah Prestone Tynsong bad u Bah Sniawbhalang Dhar.