Leit jngoh ka DREAM bad ki seng longkmie ia ki jaka ai jinghikai ia ki kynthei

Ka Drug Reduction, Elimination & Action Mission (DREAM) hynne ka sngi ryngkat bad ki kynhun seng Longkmie bad Seng Kynthei ki la leit jngoh ia ki Vocational Training Institute na bynta ki kynthei ba don ha kylleng ka nongbah Shillong.

Ki dkhot jong ka Seng Kynthei Katholik, Lympung ki Seng Kynthei bad kiwei kiwei ki Seng Kynthei na kylleng ka sor Shillong ki la leit jngoh ia ka Industrial Training Institute (ITI) Shillong, Don Bosco Youth Centre (DBYC) bad ka Don Bosco Technical School (DBTS).

“Kane ka jingleit jngoh ka long da ka jingthmu ba kine ki kynhun jong ki kynthei bad longkmie kin sakhi ia ki jingai jinghikai pyntbit kaba la ai da kine ki jaka hikai, khnang ba kan pynlong ia ki ba kin leh ia ki bynta kiba kongsan ha ka imlang sahlang” la ong u Director jong ka DREAM Mission u Bah Francis Kharshiing.

Kum shi bynta jong katei ka jingshim ia ka sienjam hapoh jong ka “Catch Them Young”, ka DREAM kan sdang ia ka prokram da kaba iatreilang bad ki kynhun jong ki seng kynthei bad kane ka sienjam kan phaikhmat ha kaban ithuh bad ban lum ia ki khynnah, khamtam ia ki khynnah kiba la iehnoh ia ka jingpule bad ia kito kiba la shah ktah ha ka imlang sahlang, ka bor pyrkhat pyrdain bad ka ioh ka kot na ka jingngop ha ki jingdih pynbuaid.

U Bah Francis Kharshiing ula pyntip ba ki nongioh jingmyntoi kiba la dep ban ithuh kin ioh ia ka lad ban shah ialam ha ki kynhun jongki dkhot ka Seng Kynthei ban leit jngoh ia ka ITI, DBYC bad DBTS, ha kaba kin ioh ia ki jingtip kiba pura bad kaba bniah halor ki jingioh jingkhaii ha ka khaii pateng bad hadien kane yn sa pynrung pat ia ki ha ki prokram ai jinghikai pyntbit katkum ka jingjied ka jongki bad kan don ruh ka jingai jingkyrshan ban ioh ia ki lad ban kamai kajih hadien ba kila pyndep ia ka jingioh jinghikai.

Ula ong, ba kane ka sienjam ka thmu ban shimkhia ia ka jingeh kaba mad mynta da ka imlang sahlang, ban pyrkhing ia ki samla ba kin ym ngop ha ki jingdih pynbuaid bad ban thaw ia ki lad ban kamai kajih na ka bynta kito kiba shah ktah bad kiba la iehnoh ia ka jingpule bad kumta ka DREAM ka iengskhem ha ka jingkular ban tei ia ka imlang sahlang kaba khlain da ka jingiatreilang bad ban pynkup bor ia ki jaka ai jinghikai ban kin long kiba iaineh, kiba tbit bad ia ka pateng kaba lait na u drok.