Pdiang ka NATWA ia ka jingpyniaid Serial Number ban kit Coke na ki karkhana ha thain Nongjri

Hadien ka jingiakynad hapdeng ka Meghalaya Commercial Truck Owners & Drivers Association (MCTODA) bad South West Khasi Hills Truck Owners & Drivers Association (SWKHTODA) kaba la pynlong ruh ia kitei ki ar tylli ki seng ban sangeh shipor ia ka jingkit ia u coke na ki karkhana kiba don ha thain Nongjri, kaba hap hapoh ka Ranikor Civil Sub-Division, ka Nongjri Area Trade Welfare Association (NATWA) ha ka Lah Sngi U Blei ka la pynlong ia ka jingialang ha shnong Nongjri ban iamir jingmut halor katei ka mat kaba la ktah ia ki paitbah ka thain.

Haba ïakren bad ki lad pathai khubor, u President ka NATWA, u Bah Mandilos Nongbri u la pyntip ba ka jingïapher jingmut hapdeng kitei ki ar tylli ki seng trok ka dang ïai bteng haduh mynta ka sngi ha kaba baroh ar tylli ki seng ki la pynsangeh ruh shipor ïa ka jingkit ïa u Coke na ki karkhana ha ka thaiñ Nongjri mynta la jan shibnai bad kane ka la ktah jur ïa ka kamai kajih jong ki paidbah ka thaiñ.

“Hadien ba la ïatai sani bha, ngi la rai ban pdiang ïa ka jingai jingmut ban pyntreikam noh da u ‘serial number’ ha kaba baroh ar tylli ki seng, kata, ka SWKHTODA bad ka MCTODA ki dei ban wanrah noh ïa ki ‘registration number’ jong ki kali sha ngi ka NATWA khnang ba ngin ioh ban pynbeit noh bad ba ka ka jingkit ia u coke kan ioh ban sdang biang,” ong u bah Nongbri.

U bah Nongbri u la ong ba ka NATWA ka la kyrpad ruh ia ki Association baroh ar tylli ba kin wad ia ki lad ki lynti ban weng noh ia katei ka jingiapher jingmut khnang ba ki kali na baroh artylli ki seng jong ki, kin ioh jingmyntoi lyngba ka bylla ka sngi da kaba kit ia u Coke na katei ka thain.

U Nongbri u la maham ruh ba lada don kano kano ka jingpynkhein ia kane ka jingpynbeit ban iaid noh da u Serial Number, u nongniah bad u trai jong kata ka kali ryngkat bad u trai jong kata ka karkhana, kin hap ban shim ia ka jingkitkhlieh.