Buh mawnongrim ba T. 52 lakh u Myntri Rangbah ban shna Building ha WGH

U Myntri Rangbah ka Jylla u Conrad K. Sangma ha ka sngi Saitjain, ula buh ia u mawnongrim ban shna ia ka Multi Facility Building ha Dakopgre ha West Garo Hills kaba kot T.52 lak.Ia kane ka projek la bei tyngka lyngba ka Chief Minister’s Special Development Fund (CMSDF) bad ka Meghalaya Basin Development Authority (MBDA), ka dang pynkhreh ban tei ia ka multi-purpose ban plie lad ha kaban tei ia ka roi ka par jongki samla, ka jingai jinghikai pyntbit bad ka long ruh kum shi bynta ban pynkylla ia ka Tura kum ka sor kaba kongsan, ka jaka jngohkai hashwa ban pynlong ia ka National Games ha u 2027.Haba ai jingkren u Conrad Sangma ula ong, ba kane ka sienjam ka pyni ia ka jingpynleit jingmut ka sorkar ia ki jingtei ha ki shnong ki thaw bad kiba iadei bad ka imlang sahlang bad ula ong ba ha ki 8 snem kiba la leit, ki lah trei kum ka kynhun ban wanrah ia ki jingkylla kiba kongsan.

U Myntri Rangbah ula pynpaw ruh ba ki jingtei kiba donkam ha kylleng ka Dakopgre, kaba kynthup ia ka P. A. Sangma Integrated Sports Complex, ka Additional Secretariat bad ka jingtyrwa ban tei ia ka Five-Star Hotel da ka jingthmu ban kyntiew ia ka kam jngohkai bad ka pynbna ia ki kam ban leh na ka bynta ban pynitynnad ha lynter jongka P.A. Sangma Road naduh na Araimile Junction shaduh Ballongre ha kaba yn buh ia ki Street Light, CCTV, ka jingpynwandur bha ia ki jaka bad ia ki jaka kiba jyrngam na ka bynta ki paitbah. Ula iathuh ruh ia ki kam kiba la iaid shakhmat ha Baljek Airport bad ka banjur ba kine ki projek kin nang kyntiew ia kane ka thain ha ka jingdon ia ki jingtei ki bapher bapher bad kan kyntiew ruh ia ka kam jngohkai bad thaw ia ki lad ban kamai jakpoh bad ula kyntu ia baroh kiba donbynta lang ban pynthikna ba ka jingtei kadei ban iaid bad bud ia ka kyrdan bad dei ban pyndonkam katba lah ia ki jingtei kum ki shlem jong ka imlang sahlang.U Conrad ula ai jingmut ban ai jaka ban ioh ban ialehkai, ka tem ka put, ki jaka ai jinghikai bad ki prokram ban ban tei ia ka sap ka phong jong ki samla bad ki kynthei kynthup ia ka kam suhjain, thain jingthain bad ka food processing ne jingpynmih ia ki jingbam bapher.

Ula pynpaw ba ka Tura ka long kaba kongsan bha na ka bynta ka National Games 2027, ha kaba kan pynlong ia ki 6 tylli ki jait jingialehkai ha ryngkat bad ka jingpynhap pyrda ia kane ka lympung iakob ialehkai bad kane kan dei kawei na ki rynsan iakob kaban heh tam ha ka histori jong ka jylla bad ka Dakopgre kan leh ia ka bynta kaba kongsan bha bad ula kyntu ia ki nongshong shnong ban iashimbynta shitrhem ha kaban pynkhreh ia kane ka thain. Ha kane ka jingialang la wan iashimbynta da ki nongialam shnong, ki dkhot nongshong shnong, ki nongmihkhmat na ki Balang bad la buh jingduwai ba kan don ka jingseisoh ha kaban tei pyndep ia kane ka projek.