Ka BJP kan long ka seng heh paid ha u 2028: Kop u Anil Antony

U National Secretary ka BJP uba khmih ia ka Meghalaya u Anil Antony hynne ka sngi, ula kob ba ka seng BJP kan sa kylla ka seng kaba heh hapoh ka Meghalaya ha u snem 2028 bad katba nang mih ki sngi ka BJP ka la nang suhthied ha ka thaiñ shatei lammihngi bad wat hapoh ka jylla Meghalaya.

Haba iakren bad ki nongthoh khubor, u Antony ula ong, ba ha u snem 2028, ka BJP kan kylla long kum ka seng sain pyrthei kaba heh ha ka jylla Meghalaya bad ka BJP kala nang kiew bha ha kine ki snem kiba la dep.

Ula ong, “Ha ki snem kiba la dep, ha kylleng jong ka thaiñ shatei lammihngi, ka BJP kala nang pyniar ia ki dienjat ki jongka. La bun snem mynshwa ha ka thaiñ shatei lammihgni, ka BJP kam shim la don wat tang shi ‘Seat’ ruh hynrei mynta ha ki 7 ne 8 tylli ki jylla ka dei kaba la synshar da ka NDA kynthup hapoh ka Meghalaya. Ha ki 4 tylli ki jylla, ka BJP ka dei ka seng kaba heh paid tam ha Assam, Arunachal Pradesh, Manipur bad Tripura bad ha kiwei pat ki jylla, ka seng ka la nang pyniar ia la ki dienjat bad phin sa iohi ba ka seng kan sa nang iar bad kan sa ioh shuh shuh ia ki nongmihkhmat hangne”.

U Antony ula ong, kumba long ha kiwei pat ki jylla, ka seng ka don ia ka jingangnud ban long kaba wan nyngkong ha Meghalaya ruh.

Ha kaba ia dei bad ka jingpynkynriah ia ka elekshon MDC jongka Garo Hills Autonomous District Council (GHADC), une u Nongialam ka BJP ula ong, ba ka seng kadei kaba la pynkhreh bha na ka bynta ka elekshon hashwa ba kin mih ki jingjia ki bym lah ban mutdur bad kadei ruh ka seng kaba nyngkong ban ia kiwei pat ki seng ban pynbna ia ka kyrteng jong ki kyrtong kiban iakhun ia ka elekshon jong ka GHADC.