Dawa ka HANM ban pynkhlain bor pahara ban shngain ki paidbah ha khappud

Namar ka jingbym shongsuk shongshngaiñ ha ki shnong khappud ka jylla Meghalaya bad Assam khamtam ha Ri Bhoi District kaba la wanrah jingeh shikatdei ia ki nongshong shnong, mynta ka sngi ki nongialam ka Hynniewtrep Achik National Movement (HANM) ki la leit ban ai da ka dorkhas ha ka Additional Deputy Commisioner ka district ban pynsngew ia ki jingeh sha ki bor ka sorkar Meghalaya.

Ia ka jingleit aiti ia ka dorkhas na ka liang ka HANM la ialam da u samla Sumar Lyngdoh kum u Vice President bad u samla Reynold Dkhar General Secretary nalor kiwei kiba la iakynduh ia ka ADC ka Kong Balakyntiew Rani ha kaba la kyrpad ia ka ban rah ia kane ka mat sha u Deputy Commisioner kumjuh sha ki bor bahalor jong ka sorkar jylla.

U samla Sumar Lyngdoh, u la ong ba ka seng kaba na ka por sha ka por ka ju rah ia kine ki mat halor ki jingeh jong ki nongshong shnong ha ki shnong khappud hynrei ka sorkar ka shu hun ban sngap jar khlem da leh eiei, u la kdew ba ki jingjia shah thombor bad shah pyndik ki nongshong shnong ha khappud ka Meghalaya bad Assam khamtam ha Ri Bhoi District ki la nang iai jia na ka por sha ka por.

Ula ong ruh, ba ka seng dang shen ka la ioh jingujor halor ki jingjia shah thombor ki paidbah nongshong shnong ha khappud khamtam ki bor jong ka tnad Forest Assam ki ju pynibor bad iai pynthut ia ki paidbah bad dang shen u wei u nonghikai ula shah shoh shah bom ha ki briew ka tnad Forest Assam haduh ba u la mynsaw jur.

Kumta halor kane ka bynta, na ka liang ka HANM ka la ban jur ba ki bor pyniaid district ki dei ban shimkhia mardor ia kane ka jingeh ban ia kren bad ki bor sorkar jylla khamtam ban pynkhlain ia ki bor pulit ban pahara sha khappud ban peitngor ia ka shongsuk shongshngaiñ jong ki paidbah nongshong shnong.

Shuh shuh ruh, ka HANM ka la ai jingmut ruh, ba ki nongialam jong ki Hima, ki Dorbar Raid bad ki Dorbar Shnong ki dei ban ia shong pyrkhat halor kine ki jingeh jong u paidbah ha ki shnong khappud khnang ban lah ban weng ia kum kine ki jingeh.