Iamir jingmut ka Thomas Jones Synod Kolej ban pynkhlaiñ ia ka lawei ki khun samla

Mynta ka sngi u symbud myntri ryngbah ka sorkar Jylla u Sñiawbhalang Dhar ula leit shim bynta ha ka jingialang iamir jingmut ba la pynlong da ka Thomas Jones Synod College Jowai halor kumno ban pynkhlaiñ ia ka lawei ki khun samla ia kaba la tip kum ka “Empowering Tomorrow:An Avenue Towards Excellence”.

Ha kane ka jingiamir jingmut la donlang ki samla pule, ki kmie ki kpa jongki samla pule lem ki nonghikai bad ki dkhot governing body ka college.

U Octomewot Lamin Nominated MDC JHADC kum u symbud kongsan ha kane ka jingiamir jingmut ula ban jur halor ka jingdonkam ka jingiatreilang khnang ban lah pynkhlaiñ iaka lawei ki samla haka lynti ban kiew shaphrang.

Naka bynta ki khun samla u ong donkam ban minot pule kot haka por ba dang leit skul khnang ban longbriew manbriew hadien habud, namar katno kan long ka jingkmen bakhraw iaki kmie ki kpa bala pynlut pynsep haba ki khun ki poi shaka thong.

Naka bynta ki kmie ki kpa pat u ong, ha kine ki sngi dei ban ai mynsiem ruh iaki khun ha kano kano ka sap ba ki don, kumba ka sorkar ruh kala plie shibun ki lad ki kabu naka bynta ki khun samla hala ki jong ki jong ki sap ba ki don.

Naka liang u kongsan Sñiawbhalang Dhar pat haba kren u ong ba u dap daka jingkmen ban ioh sam jingmutlang haba iadei bad ka phang naka bynta ban pynkhlaiñ iaka lawei ki khun samla, ba watla dei ka jingialang barit ruh hynrei kaba don jingmut bha.

Bad kumba bun hi ki jingeh ba mad tyngkhuh ki jaka pule, u pyntip ba naka liang ka sorkar ruh kala pyrshang lehbha katba lah la haka jingiadei ki jingtei jingshna, nalor ban ai jingkyrshan pisa iaki skul ki College.

U iaroh ruh iaki bor pyniaid ka Thomas Jones College ba ka iohi jngai ban pynlong kum kane ka rynsan iamir jingmut ha ryngkat ki samla pule ki kmie ki kpa khang ban tip ha kano ka rukom yn kyntiew iaka pule puthi.

U ong ba don ruh ki bynta ba shem jingeh ki jaka pule, ha kaba la iakren ia kane ruh.

Shuh shuh u ong ka Thomas Jones Synod College dei kaba kiew naka por shaka por ha kaba ynda khapngiah ka Kiang Nangbah Govt College ki samla pule ki leit pule hangne kumba dei ka jaka ba long pdeng ha ka district, ha kaba na ka liang ka sorkar ruh ka juh iarap kyrshan beit ia kane ka college.

Kumba kane ka college kala pynsngew ruh ha u ia kiwei de ki jingdonkam jong ka haba iadei bad ki jingtei jingshna, kum ka auditorium, ban iarap haba ia dei bad ka tulob ki nonghikai, kumta u ong ba na ka liang ka sorkar kan sa peit iaki bynta ba lah ban iarap bad kan sa leh ia kata khamtam ba mynta la bun bha kiba pule ha kane ka college.