Shah jied u Bah EJ Myrthong kum u RS ka shnong Umden

Ka Dorbar Shnong Saiden, Nongpoh, Ri Bhoi District ka la ioh ban jied ia ki nongkitkam thymmai ka shnong ia u Bah EJ Myrthong kum u Rangbah Shnong bad ia u Bah S Kharlukhi kum u Secretary Shnong ryngkat bad ki Executive Members ka Shnong bad 7 ngut ki Rangbah Dong hapoh ka Shnong Saiden.

Kane ka long hadien ka jingkhlad noh Rangbah Shnong barim, u Bah EK Lapang bam kwai ha Dwar U Blei, ki la pynlong ia ka sorbar ba jied ia ki nongkitkam thymmai ka shong Saiden ha Ri Bhoi District hynne ka sngi.

Kum ban pynpaw ka jingjied Rangbah Shnong Saiden ha ka 25 tarik bnai Iaiong 2026 la wan ban shim shitrhem da ki paidbah nong shong Shnong baroh kawei.

Kaba sngewtynnad ha kane ka sngi la pynkupbor ia u Rangbah Shnong bad u Secretary Shnong jong ka Shnong Saiden bad ai synrnot da u Bah Luistar Lyngdoh uba dei u Acting Sirdar ka Nongpoh Elaka bad ula pynspong da ka jain tynrai ryngkat bad u Paila kum ka dak jong ka jingpynkupbor ia ki nongialam shnong ka Shnong Saiden bad kumjuh ka jingpynbam smai kum ki nongialam shnong Saiden ryngkat ka jingiadon lang ki longsan ki mansan na kiwei ki raid ryngkat ki Rangbah ki longkmie ki samla jong ka Shnong Saiden baroh kawei.

Haba ai jingkren u bah Luistar Lynngdoh ula ong, haba jied ia ki rangbah shnong ki dei ban pyntip sha ka Elaka khnang ba ki nongialam kin long ki nongpeit ki nongkhmih lane ki Observer ha ka por ba jied ia ki nongialam shnong, ula bynrap kum ka Elaka bad ka Dorbar Shnong ka donkam ka jingiatreilang ha ki Lai tylli ki mawbyrsiew ba kynthup ia ka Dorbar Shnong ka Dorbar Raid bad ka Dorbar ka Elaka khnang ban wan rah ia ka jingiatylli ka jingiasngewthuh jingmut.

Ula bynrap lada ki paidbah ki don kano kano ka jingbym ia sngewthuh jingmut hapoh shnong poh thaw ki dei ban iakynduh ia u Rangbah shnong khnang ban lait na kino ki jingiapher jingmut bad kum ki paidbah nong shnong kim dei ban iaid lait na u Rangbah Shnong lane na ki nongialam shnong na bynta ka imlang ka sahlang.

U Rangbah shnong ba shah jied thymmai haba ai jingkren ula ong, lada ki nongshnong Saiden baroh lada ki dei kiba vote ia u ne ki bym thep vote un ai ka jingtrei ia baroh lang khlem ka jingleh shilliang iano iano ruh bad ula kular un shimkhia ia ka kam shnong da ka jingtip briew tip Blei bad ban pyndep hok ia ka kam shnong na bynta ka roi ka par bad ka imlang sahlang hapoh shnong.