Iaid paidbah ha BJP ha Shillong, pynrem ia ka Congress bym kyrshan ia ka Womens Reservation Bill

Ka BJP Mahila Morcha Meghalaya Pradesh hynne ka sngi ki la pyrta da ka sur ba jam ban pynrem jur ia ka Congress ka bym shym la ai jingkyrshan dang shen ha Iing Dorbar Thawain ka ri ban pynlong ain ia ka Womens Reservation Bill ban long nongthaw ain sha Lok Sabha bad ha Dorbar Thawain ha Assembly.

Ha kane ka sngi ka BJP Mahila ki la iaid paidbah ryngkat ka jingrah ia ki plakad bad pynrem jur ia baroh ki party kiba don ha ka liang pyrshah ha iing dorbar Thawain ka ri.

Kum ban shu kdew kane ka Bill ka la shah rem ha ka parliament ban ioh ar na ka lai bynta ka jingbun paid ban pynlong ain ia ka, ha kaba kiba kyrshan ki don tang 298 vote katba kiba pyrshah ki don 230 vote.

Ka jingthmu kane ka Bill ka long ban mang bhah 33 percent ia ki kynthei ban long nongthawain ha Lok Sabha bad ha dorbar thawain Assembly ha ki jylla bad Union Territories ha ka ri. Ha kane ka Bill, la tyrwa ban pynbun ia ka jingdon ki MP ha Lok Sabha na ka 543 ngut sha ka 816 ngut bad ban pynwan dur thymmai ia ki parliamentary constituency hynrei ka la shah rem noh na ka jingbym kyrshan ka liangpyrshah.

Haba kren sha ki lad pathai khubor ka State President ka BJP Mahila ka kong Arena Hynniewta ka la ong ba ka jingiakhih jong ki, ka long ban dawa ia ka hok kaba 33 percent kaba la mang kyrpang ia ki kynthei.

Ka kong Hynniewta ka la ong ba ha ka jingshisha kane ka Bill ha ka ka ladei ban long ain, hynrei ki seng sain pyrthei kiba don ha ka liang pyrshah kim shym la trei ryngkat bad kim shym la kyrshan ban pynurlong ia kane ka jingdawa ka ba la slem bah.

“ Nga sngew diaw bha namar kane ka hok 33 percent la mang kyrpang ia ki kynthei, kam shym la urlong namar ka jingbym kyrshan ki liang pyrshah. Ngi donkam bha ia kane ka ain khnang ba ngin sngewshngain ba ngin trei ban mihkhmat na bynta ka ri bad ka jaidbynriew ban iada ia ki khun bad kino kino ki phang ba iadei bad ki kynthei,” ka la ong.

Ka kong Hynniewta ka la ong ba kane ka Bill kan iarap shisha ia ka ri ban ailad ia ki kynthei ba kin iatreilang ha iing Dorbar namar ka kynthei ka kham long sani ha ki kam haba iadei bad ka imlang sahlang, ka koit ka khiah nalor kiwei de.

“ Lada ngi ioh ia kane ka bhah ka jylla jong ngi kan nang kiew khamtam kane ka jylla jong ngi kaba la shah pynkup burom lypa ia ka kur ka jait,” ka la ong.

Ka la ong ba na ka liang ka BJP Mahila ka la rai ba kan dawa beit ia kane ka bhah haduh ba kin da ioh ia ka hok kaba la mang kyrpang bad ka la kyntu ia baroh ki kynthei ba kin kyrshan ia kane.