Da Personal Bond ba T.50 hajar Ioh jamin ka Sonam, bym biang ki sakhi

Ka Iingkashari ha Shillong, ka la pyllait jamin ia ka Sonam Raghuvanshi, ka kaba shah kynnoh pyniap ia la u kurim, u nongkhaii na Indoor (L) Raja Raghuvanshi, hadien ba ai rai ba ki pulit kim shym la lah ban pyntip bha ia ki nongrim halor ki daw ba kem ia ka Sonam. Ha ka hukum ba pynmih ha ka sngi Nyngkong (27 Iaiong), haba pynwai ruh ia ka jingkyrpad bah jamin, ka Iingkashari Additional DC (Judicial) DR Kharbteng, ka ong ba ki jingduna ha ka rukom pyniaid ia ki kam ba long pyrshah ia ka riti synshar katkum ka Article 22(1) bad ka lah ban ktah ia ka nongrim ban iada ia lade da ka nongshah kynnoh. Ka Iingkashari ka la kdew ia ki jingdkoh kiba bun kiba lah ban iohi na ki kot ki sla kiba ia dei bad ka jingkem ia ka. Katba ia ka ejahar ha Sohra PS Case NO 7/2025 lah register hapoh ka kyndon 103 (1)/238(a)/309(6)/3(6) jong ka BNS, ka “jingpyntip ia ki nongrim ka jingkem” ba la pynngat ia ka Sonam la kdew da ka kyndon 403 (1) ha ka jaka jong ka 103(1). “Haba pule bniah ia ka Annexure 8….ha katei ka format ba la ai sha ha u nongujor, ym shym la buh kawei ruh ka dak ha ka check box ban pynpaw ia ki jingpynngat kyndon (charges) pyrshah ia ka nongujor” ong ka hukum.

“Wat ki kyndon jong ka Ain ba la kdew ha ka Sohra PS Case No 7/2025 u/s 403(1)/238(a)/309(6)/3(6) BNS.” U Judge ula kyntait ia ka jingpynksan jong u nongiasaid ba ka dei ka jingleh bakla ba pynkhreh ia ki kot ki sla, haba pynpaw ba kum kine ki jingbakla ki la paw ha kiba bun tylli ki kot ki sla,“Ha baroh ki kot ki sla ba ia dei bad ka Sonam Raghuvanshi, naduh ka check list ban pynshisha ia ka jingkem, ka memo ba kem, inspection memo, ka jingpyntip ia ka hok jong ka briew ba shah kem, ka passoh jong ka case diary, ka kyndon ba la kdew ha baroh ki kot ki sla ka long….u/s 403(1)” ong ka Iingkashari.“Ha ka jingpeitbniah…..kan pyni ba ka nongmudui kam shym la ioh jingtip halor ka jingkynnoh ba hap hapoh ka kyndon 103(1) BNS” ka la bynrap.Ka Iingkashari ka la pyniapher ia kane ka case na ka Darshan Case ha kaba ki nongshah mudui ki la ioh ia ka jingtip halor ki nongrim ba kem ia ki da ka jingbatai da ka ktien ha ka por ba kem bad la pynbud pat mar mar da ka jingthoh…kumta ia ka jingdonkam hapoh ka kyndon 50A Cr.P.C….lah pyntreikam pura”. Ka Iingkashari ka shem ba ki Pulit kim shym la ai ia ki jingtip kaba shai halor ka nongrim ka jingkem sha ka nongmudui bad bynrap ba kane ka buh ia ka nongmudui ha ka umdum ba kan lah ban iada ialade

Ka la pynpaw ruh ba “kam don eiei ha ka jingthoh ban pyni ba ia ka nongmudui la mihkhmat da u/ka nongsain ain ha ka por ba la ialam nyngkong eh ia ka sha Iingkashari ha Ghazipur”.Haba kdew ia ka rai ka Supreme Court ha ka mukotduma u Vihaan Kumar bad ka hukum ka Iingkashari Meghalaya High Court ha ka Labius Areng, ka Iingkashari ka shim “Halor ki jingshisha bad ki jinglong jong kane ka mukotduma, ka Iingkashari ka sngewskhem b aka nongmudui ka la lah ban pynksan ia ka nongrim jong ka namar ba kam shym la shah pyntip shai halor ki nongrim ka jingshah kem jong ka”.“Namar kata…ka nongmudui ka don ia ka hok ban shah pynlait noh da ka bah jamin” hukum ka Iingkashari.Ka Sonam Raghuvanshi ka shah set haduh 10 bnai ha District Jail bad Correctional Home, Shillong naduh ba la kem ha ka 9 tarik Jylliew 2025 na Ghazipur, Uttar Pradesh, yn sa pynlait noh da ka personal bond ba T.50,000 ha ryngkat ki ar tylli ki suretied ba dei ha kajuh ka dor. Ka iingkashakri ka la bthah ia ka Sonam ba kam dei ban jah rngai lane pynjulor ia ki sakhi satar, ba ka dei ban wan mih sha Iingkashari ha man ki sngi ba buh ban bishar, ba kam dei ban mih shabar u pud u sam ka Iing kashari, lait noh satang da ioh jingbit bad ka dei ban pyntreikam ia ka personal bond ba T.50,000 ha ryngkat ki surety ba katjuh ka dor.