Ka sorkar kam kwah pynjari ‘Administrator’ ha GHADC ban ai lad pynkylla ia ka AD Rules

U Symbud Myntri Rangbah ka Jylla uba khmih ia ka tnad District Council Affairs u Bah Prestone Tynsong hynne ka sngi, ula pynshai ba ka jingbym thung ‘Administrator’ ha Garo Hills Autonomous District Council (GHADC) ka dei na bynta ban plie lad ia ka Council ba kan lah ban pynkylla ia ki AD Rules namar u Administrator um lah ban mynjur ia ka jingpynkylla ia kino kino ki Rules.

Haba iakren bad ki nongpathai khubor, u Bah Prestone ula pynshai ba ka sorkar kala pynjlan ia ka samoi treikam jong ka District Council ka long ban ailad ia ki MDC bad ia ka iingdorbar ba kin wanrah ia ki jingpynkylla ia ki Rules hynrei lada ka sorkar ka pynjari da ka jingsynshar Administrator, kumta u Administrator u don ia la u pud bad yn um lah ban mynjur ia ki Bill ne ban pynkylla ia ka Rules ne Act.

“Ym don mano mano ruh ba lah ban leh ia kane lait noh tang hapoh ka iingdorbar Thaw Ain jong ka District Council” la ong u Bah Prestone bad ka iathuh ba ka sorkar kam banse ban pynjlan sa 6 bnai ia ka samoi treikam khnang ba ka iingdorbar kan lah ban wanrah ia ki jingpynkylla kiba donkam.

Lah ban ong, ba ka jingpynjlan ka sorkar ia ka samoi treikam jong ka GHADC kadei hadien ba la mih ka jingiakynad ha rilum Garo halor ka jingioh iashimbynta ki bar jylla ha ka elekshon ka GHADC, bad kane ka jingpynjlan kadei ka jingplie lad ia ka GHADC ba kan ioh ban wanrah noh ia ki jingpynkylla ia ka AD Rules ha kaba iadei bad ka jingiashimbynta bad ka jingiakhun ha ka elekshon GHADC.