Iateh ka sorkar bad ka KfW Development Bank ban kyntiew kam rep khlem dawai

Ka Jylla Meghalaya ka la thmu ban pynjylliew sha ka rep ka riang hadien ba u Myntri Rangbah ka Jylla u Conrad Sangma hynne ka sngi u la ïakren bad ki ophisar ka Germany’s KfW Development Bank ban ïamir jingmut halor ka jingthmu ban wanrah ka jingpynkylla ïa ka rep ka riang khlem pyndonkam dawai (Organic) hapoh ka Jylla. Ka jingiatreilang bad ka Germany’s KfW Development Bank ka tyrwa iaka rep ka riang ym tang kum ka kam ban kamai ja kpoh hynrei kum ka rukom kaba lah ban ïeng bad neh shiryrta, kaba lah ban pynmih ia ka ioh ka kot kaba lah ban ialeh pyrshah ia ka jingkylla ka suinbneng bad kaba lah ban pynkhlain ia ka jingim haki thaiñ nongkyndong.

Ki jingiakren ki long halor ka jingkyntiew ia ki rukom rep kiba iadei bad ka mariang bad ki rukom rep kiba pyniadei ia ka jingpynneh pynsah ia ka mariang bad ka jinglah ban pynneh pynsah ia ka ioh ka kot, ka bynta kaba kongsan tam na ka bynta ka Jylla namar ba ka dang iai bteng ban ialeh pyrshah ia ki rukom rep kiba duna ka jingshah ktah ka mariang. La khmih lynti ba kane ka jingthmu kan pyniasoh lang ia ki buit kiba lah ban ialeh pyrshah ia ka jinglong ka suinbneng, ban pynbha ia ka jingkoit jingkhiah jong ka khyndew bad ha kajuh ka por kan plie lad thymmai ia ki nongrep lyngba ka jingpynkiew dor iaki mar bad ka jingiajan iaki nongrep bad ki iew ki hat.

Haba pyntip shaphang kane ka jingïalang, u Myntri Rangbah ka Jylla ula ong “La don ka jingïalang bad ki ophisar ka Germany’s KfW Development Bank ban ïakren ïa ka projek ba la tyrwa kaba thmu ban kyntiew ïa ka rep ka riang kaba lah ban neh shiryrta, kaba lah ban ïakhun pyrshah ïa ka jinglong ka suiñbneng kaba thmu ban kyntiew ïa ka rukom treikam ha ka rep ka riang. Khmih lynti ban iatreilang ban kyntiew ia ka rep ka riang ka ban thaw ia ki lad ki lynti kiba kham heh na ka bynta ki nongrep jong ngi”.