Palat shisnem yn thut ka jingsam bording ba pyntrei ia ka RDSS: Metbah

Ka Jylla Meghalaya kan dang bteng ban mad ka jinglip light sa kumba shisnem tam namar ka jingpyntrei ia ka skhim Revamped Distribution Sector Scheme (RDSS) ha baroh ka Jylla. Ia kane la pyntip da u Myntri ka tnat Bording u Bah Metbah Lyngdoh bad ula ong, ba ka jingpyntrei ia ka skhim RDSS ka dang shaid shaid na ka bynta ban pynbha ia ka rukom sam bording sha ki paidbah. Haba kren sha ki lad pathai khubor u Bah Metbah ula ong, ba ka jingdon ka jingduh bording ka dei namar ka jingshah pynjulor ha u slap bad ka eriong bad ruh ka jingdonkam ban pynlip bording namar ba dang maramot ne pynbha ia ki kor sam bording.

U Bah Metbah ula ong, haduh mynta kam don satia ka Load Shedding bad ka jingud ki paidbah ba don Load Shedding ka dei tang ka jingsngewthuh bakla ia ka jingdonkam ban pynlip bording namar ba dang pyntrei ia ka skhim RDSS bad kiwei ki kam maramot. “Lada donkam ban pynlip bording ban ai lad ia ki nongtrei ban pyndep ia ki kam, ka tnat ka phah kyrwoh lypa sha ki nongialam Shnong, ki Nokma hynrei don ki khep ba ka bording ka shu jah la ka jah namar ka jingshah pynjulor ha ka bor mariang” la ong u Bah Metbah.

U Myntri ula pyntip nalor ka skhim RDSS, ka Jylla ka sakhi ruh ia ka jingpyntreikam ia ka skhim Additional Household Electrification. Ula iathuh kane ka skhim ka dang shu sdang shen bad ia ka Survey la pyndep da ki Contractors lyngba ka Sub Division bad shen kane ka skhim kan sdang paw pyrthei noh.