Pynlong ka Civil Defense ia ka Mock Drill ha baroh kawei ka Jylla

Ka tnat Directorate of Civil Defense & Home Guards, Meghalaya, Shillong hynne ka janmiet ka la pynlong ia ka Mock Drill ha baroh kawei ka Jylla, ha kaba ia dei bad ka Air Raid bad ka jingpynlip bording (blackout) ia kaba la ai kyrteng “ARMEX-I 2026” ha baroh ki District ka Jylla.

Ia kane ka Mock Drill la pynlong ha ki ar bynta, kaba kynthup ban rieh lada don jingshah thombor, ban ai jingiarap bad ki jingai jingiarap kyrkieh bad ka Blackout.

Ha ka bynta I, la pynleit jingmut ha ki jingwad bad ban ai jingiarap bad kyrkieh ban pyllait im, ki jingai jingsumar, ka jingpynkynriah briew.

La pynlong iaka Mock Drill naduh ka por 3baje janmiet haduh ka por 4baje janmiet.

“Ïa ka siren jong ka Civil Defence kala sawa ha ka por 3:00 janmiet ha baroh ki district ban ai dak ïa ka jingsdang jong ka Mock Drill bad ban pyni nuksa ïa ka jinghiar thma (Air Raid)” la ong ka Directorate.

“Ha ka por 4:00 PM, la pynsawa biang ïa ka siren ban pyni ïa ka dak ba ym long eiei (All Clear) bad ka jingpynkut ïa ka Stage I.” Hadien ba la dep ïa ka Stage I, la pynlong ïa ka jingïalang kyrkieh ban lum jingpyntip na baroh ki District.

Ka Stage II ka la pynleit jingmut ha ka “jingsawa jong ki liengsuiñ bad ka jingpynlong ïa ka jingpynlip ding (Blackout) bad la pynlong naduh ka por 6:59 baje janmiet haduh ka por 7:02 baje janmiet.

Ha ka por 7:00 janmiet la pynsawa ïa ka siren jong ka Civil Defence ban ai dak ïa ka jinghiar thma liengsuiñ (Air Raid) bad ka jingsdang jong ka jingpynlip bording (Blackout)” la ong ka directorate.

Ka jingpynlip bording (Blackout) ka la neh ar minit bad la pynkut noh ha ka por 7:02 PM da ka jingsawa jong ka siren ba ym don eiei (All Clear) kaba pyni ia ka jingkut jong ka Mock Drill.

Ia kane ka mock drill la pynlong ha kajuh ka por ha baroh ki District jong ka jylla ban bishar bniah ia ka jingpynkhreh bad ka jingiatreilang jong ka tnat civil defence ban iada iaki paidbah.