Shah kem 5 ngut, kurup 2 tylli ki thuk thuk ba tuh

Ki Pulit jong ka West Jaintia Hills ki la ioh kem 5 ngut kynthup 4 ngut ki khynnah ioh kurup ar tylli ki scooty ba la shah tuh na ka shnong Pdengshakap, West Jaintia Hills.

Katkum ka kyrwoh na ka Additional Superintendent Police ka West Jaintia Hills ka Kong Crescency W Lyngdoh ka la pynpaw ba ki Pulit ki la ioh ia ka phone ha ka 23 tarik Iaiong na u Bah Wanphida O Laloo na ka Shnong Ummulong, halor ka jingshah tuh ka Scooty jong u (ML05-W-6877) na Ialong Civil Hospital, Jowai bad kumta la khmih bniah ia ki video jong ki CCTV bad la lah ithuh ia kawei ka kali ia ba la suba ka dei jong uwei u runar.

Da kaba shimkhia mardor ki pulit kila pynlong iaka jingiaid pahara kaba la lam ha kaban ioh bat ia kawei ka kali kaba la suba jur ha kaba kial don 5 ngut kiba shong ha katei ka kali kaba kynthup ia ki 4 ngut kiba dang dei ki khynnah bad kumta la rah noh ia ki sha Phramer Traffic Cell, WJH District ban pynlong ia ka jingtohkit.

Ka Kong Crescency Lyngdoh kala pyntip ba ha ka jingtohkit, uwei u Khynnah uba la don lypa ia ka dak leh kam sinew ula phla ba ia ka scooty kaba la tuh la rah sha ka shnong Pdengshakap, West Jaintia Hills bad kumta halor kane ka jingai jingtip ki pulit kila leit sha katei ka jaka bad kila ioh ban kurup ia katei ka Scooty hadien ba la pyndep lut bad iaid katkum ki kyndon jong ka aiñ.

Kala pyntip ruh ba ha kaba iadei bad katei ka juh hi ka jingjia, ha kajuh ka sngi hi, ki pulit kila ioh pdiang ia ka ejahar na u Bah Bastanroy Mawthoh uba na Nongmensong Langkyrding, ha kaba ula pyntip ia ka jingshah tuh ka scooty-Yamaha Ray ZR (ML05-AF-5040) ha ka por 2:30 baje janmiet bad ia kane ka scooty ruh la ioh ban kurup na ka shnong Pdengshakap bad kila rah noh ia kine ki thuk thuk sha Phramer Traffic Cell ban ioh leh ia kaba donkam.

Ka Kong Crescency Lyngdoh kala kyntu ia ki nongshongshnong ba kin long kiba peitngor bad ban pynthikna ba kin pynieng bha ia ki kali ki jongki ha man la ka por bad lada ki suba sniew iano iano ruh kidei ban pyntip mardor sha ka thanad pulit kaba don hajan tam ne da kaba phone ha u 112.