Mar ia ioh jingujor, hiar jurip u MLA ia ki tyllong um ha ki 5 shnong

Hadien ba la ioh jingujor halor ka jingbym ioh um tikna jong ki paitbah ka shnong Mawbidong bad Manad, u MLA ka Mawkyrwat, u bah Renikton L. Tongkhar ha ka Sngi Thohdieng ula hiar jurip ia ki tyllong um jong ki 5 tylli ki shnong ka dong Riwar kiba don ha Wah Umthot, Mawten.

Ia u Bah Renik la synranlang ruh da u Executive Engineer ka tnat PHE, Mawkyrwat Division, u Bah K. Nongbsaw, ki nongialam shnong na ki 5 tylli ki shnong ka dong Riwar, kata, ka Manad, Mawbidong, Lummawbah, Pyndenlyngdoh bad Pyndensohlang lem bad kiwei de ki ophisar ka tnat PHE.

Ha kane ka jingleit jurip, u Bah Renik ryngkat ki ophisar ka tnat PHE ki la shim ia ka rai ban pynbha ia ka tyllong um bad ban pynkylla noh mardor ia ka lain jong u pipe um khnang ba ka jingtuid jong ka um kan kham khlain bad ban pyntikna ba kitei ki shnong baroh ar tylli, kata, ka Mawbidong bad Manad kin ioh um 24 kynta kum kitei ki lai tylli kiwei pat ki shnong.

Haba kren bad ki lad pathai khubor, u bah Renik u la pynpaw ia ka jingkmen ba kam shym la don satia kano kano ka jingthut ha ka jingpynpoi um sha kitei ki lai tylli ki shnong, hynrei u la pynpaw ba ka long pat kaba donkam kyrkieh ban pynbha ia ka tyllong um bad u pipe um na ka bynta ka shnong Manad bad Mawbidong.

“Kumba kitei ki lai tylli ki shnong ki ioh um 24 kynta, nga kyrmen ba da kaba pynbha ia ka tyllong um bad da kaba pynkylla ia ka lain jong u pipe um, ka shnong Mawbidong bad Manad ruh kin ioh um 24 kynta khamtam ba baroh kine ki shnong ki long kiba donbok bha namar ki ioh ia ki tyllong um kaba shu tuid baroh shisngi,” ong u bah Renik.

U bah Renik u la kyrpad ruh ia ki paidbah ka Manad bad Mawbidong ba kin long kiba iaishah bad ka sorkar namar ba na ka liang jong ka tnat PHE ka la ialeh katba lah ban weng ia kane ka jingeh.