Ko nonghikai baieid, wat shah ialam bakla ha u briew ba deng iit khmat iong: Lahkmen

U Myntri ka tnat Pule Puthi u Bah Lahkmen Rymbui hynne ka sngi, u la ther tyngeh ia u President ka Voice of the People’s Party (VPP) u Bah Ardent Miller Basaiawmoit halor ka jingkynnoh ba ka sorkar ka leh bein ia ki nonghikai, da ka ba bthah ia ki ban Pass ia ka eksamin MTET.

Haba kren shaki lad pathai khubor, u Bah Lahkmen ula kynthoh ba u President ka VPP u peit ia ka jingbthah ka sorkar ia ki nonghikai lyngba ka iit khmat iong jong u bad dei namar kane um iohi ia ka jingshisha.

U Bah Lahkmen ula ong ba ia ka MTET la pynlong ba donkam tam (Mandated) katkum ka ain Right of children For Free and Compulsory Education 2009 bad katkum ka rai jong ka Supreme Court ha ka 1 tarik Nailur 2025.

Ula ong ba katkum ka rai jong ka Supreme Court ka kdew ba ‘baroh ki nonghikai ki dei ban Pass ia ka eksamin TET, khlem da khein ia ka snem ba ki hikai lait tang kiba sah satang 5 snem ha ka kam (Service).

Nalor kane u Myntri ula ong ba kito ki nonghikai kiba don satang 5 snem haka kam kim donkam ban ialeh iaka TET hynrei ki duh pat iaka jingshah kyntiew kyrdan (Promotion).

“Ngi hap ban sngewthuh, la synshar da ka ain bad ngi hap ban bud ia ka ain bad ngim lah ban shu leh be-ain , namar kane ka dei ka rai jong ka Supreme Court bad kane ka rai kam treikam tang hapoh Meghalaya, ka treikam ha baroh kawei ka ri India” la ong u Bah Lahkmen.

“Te kumta ban ong ba ka sorkar ka leh bein ia ki nonghikai da kaba phah iakhun eksam MTET ka long ba bakla shibun, namar ki nonghikai ki tip shai bad mano ba ialam bakla bad mano ba leh bein ia ki nonghikai” ula buh jingkylli.

U Bah Lahkmen ula iathuh ruh ba don ki Organization jong ki nonghikai kiba leit tied ia ka jingkhang jong ka Supreme Court ban leit File ia ka Review petition, kum ka Association jong ka SSA bad kiwei ki kynhun. “Ka Sorkar ruh namar ba ka sngewthuh ba kam lah ban klet ia ka jingshakri jong ki nonghikai da ki phew snem, ka la file ia ka review petition hapoh Supreme Court” ula ong.

“Ngim kwah ban pynbiej ia ki nonghikai, ko nonghikai ba ieid katkum ba long mynta, ka rai jong ka Supreme Court ha u bnai September 2025 ka ieng bad baroh ki hap ban Pass ia ka TET hapoh 31 tarik Nailar 2027, lait tang kito kiba sah satang 5 snem ha ka kam” ula ong.

U Myntri ula ong, kam iahap ban kynnoh ba ka sorkar ka leh bein ia ki nonghikai bad kane ka jingkren u President ka VPP ka ialam bakla. “Nga kyrpad ia ki nonghikai ba kim dei ban shah ialam bakla ha kum kine ki briew ki bym sngewthuh ” ula ong.