Lah ban leit phai u Bah Renik sha ka NPP, shen yn pyniasoh ki nongialam UDP

U MLA ka United Democratic Party (UDP) na Mawkyrwat uba long ruh u Myntri barim ka tnat PHE, u Bah Renikton L. Tongkhar u la pynkhreh shait shait ban leit phai biang sha ka NPP – ka party kaba u la sdang nyngkong eh ïa ka kam saiñpyrthei – bad kane kan jia hashwa ban kut kane ka samoi treikam ba mynta bad ki dak ki shin ki la kdew lyngba ka jingpynkhreh jong ki nongïalam bad ki nongkyrshan jong u ban leit rung noh sha katei ka party ha u bnai ban wan.

Katkum ka jingpynbna paitbah kaba la saphriang ha ki ‘social media’ bad kaba la soi ruh da ki katto katne ngut ki nongïalam jong u Bah Renik, la ong ba katei ka jingleit rung NPP kan long ha Nativity Hall, Mawkyrwat ha ka 2 tarik bnai ban wan ha ka por 11:00 mynstep bad la kyrpad ruh ïa baroh ki nongïalam bad ki nongkyrshan jong u MLA ba kynthup naduh ki rangbah, kynthei bad samla ba kin ïapoilang ha katei ka jingïalang ban pyni ia ka jingiatylli.

Ha kane ka jingpynbna la kdew ruh ba ïa kane ka tarik la buh katkum ka rai ba la shim ha ka jingïalang paitbah jong ki nongïalam bad ki nongkyrshan jong u Bah Renik kaba la long ha ka 16 tarik u Iaiong, 2026 ha Dorbar Hall Mawkyrwat ha kaba da kawei ka sur ki la shim ïa ka rai ban pynïasoh noh sha ka NPP.

Haba kren bad ki katto katne ngut ki nongialam ka NPP Mawkyrwat Block, ki la pynthikna ba kane ka jingthmu jong u Bah Renik bad ki nongkyrshan jong u ban pyniasoh NPP ka long kaba shisha bad ba la khmih lynti ruh ba u National Vice President ka NPP uba dei ruh u Deputy Chief Minister ka Jylla, Bah Prestone Tynsong u lah ban iadonlang ha katei ka jingialang bad ban pdiang burom ia ki nongialam bad ki nongkyrshan jong u Bah Renik ha katei ka sngi.

Ki tyllong khubor na ki nongialam ka UDP Mawkyrwat Circle ki la pyntip ba baroh ki nongialam bad ki nongkyrshan jong ka Tongkhar kiba la iapoi sha katei ka jingialang paitbah ba la long dang shen ki la iamynjur lang da kawei ka sur ban pyniasoh noh sha ka NPP, hynrei ki la mynjur ruh ba ki la don katto katne ngut ki nongialam na ki primary unit bapher bapher ki bym shym la poi sha katei ka jingialang.

Ki tyllong khubor ki la kam ruh ba kawei na ki daw ba kongsan kaba la pynbor ïa u MLA ka Mawkyrwat ban pynïasoh biang sha ka NPP ka dei na ka jingkular jong ki nongïalam ka NPP ban pynioh ia ki kam pynroi bapher bapher lada u pyniasoh NPP bad kita ki kynthup naduh ka surok bah Intermediate na Weiloi sha Mawkyrwat, ka C&RD Block ha ka thaiñ Shiliang Um Rilang, ban kyntiew kyrdan Govt College ia ka Sngap Syiem College bad kiwei kiwei ki kam pynroi.